“Ҳизбуллоҳ” Исроилга қарши урушнинг янги босқичи бошланганини эълон қилди 

Ливаннинг “Ҳизбуллоҳ” гуруҳи Исроил армиясига қарши урушнинг янги босқичи бошланганини эълон қилди. Бу ҳақда “Коммерсант” хабар берди.

Ливандаги қуруқликдаги операция бошланганидан бери Исроил армияси таркибида 55 киши ҳалок бўлди ва 500 дан ортиқ киши яраланди. “Ҳизбуллоҳ” юзлаб жангчилар Ливан жанубида “Исроилнинг ҳар қандай қуруқликдаги ҳужумига тўлиқ қарши туришга” тайёрлигини таъкидлади. Улар сўнгги кунларда яҳудий давлатига қарши ҳужумлар кўпайганини ҳам билдирди.

“Исломий қаршиликнинг тезкор штаби душман Исроил билан қарама-қаршиликнинг янги ва кескинлашувчи босқичига ўтишини эълон қилади, бу яқин кунларда воқеалар ривожига таъсир кўрсатади”, деб ваъда берди “Ҳизбуллоҳ”.

23 сентябрь куни Исроил Ливан ҳудудида “Шимол ўқлари” операциясини бошлади. Исроил ҳукумати 1 октябрь куни бошланган қуруқлик операциясининг мақсади эвакуация қилинган 60 минг исроилликни шимолдаги чегара аҳоли пунктларига қайтариш учун “Ҳизбуллоҳ” таҳдидини бартараф этиш деб атади. 16 октябрь куни Исроил армияси 6 кунлик танаффусдан сўнг Байрутга зарба беришни давом эттирди.

• 17 октябрь куни Исроил Фаластиннинг ҲАМАС ҳаракати етакчиси Яҳё Синвар ўлдирилганини эълон қилди. У Ғазо секторида снайпер томонидан отиб ўлдирилган.