Фаластиннинг ҲАМАС ҳаракатига тайинланган янги раҳбар Яҳё Синвар Миср ва Қатар воситачилари орқали Исроилга сулҳга эришмоқчи экани ҳақидаги хабарни етказди. Бу ҳақда CNN телеканали Исроилдаги ўз манбасига таяниб хабар берди.
Исроил бош вазири Биньямин Нетаньяху буни хоҳлаяптими ёки йўқми, ҳозирча номаълум, дея аниқлик киритади телеканал.
CNN’нинг ҳукуматдаги икки манбага таянган ҳолда берган хабарига кўра, Нетаньяху ҳукмрон коалиция учун қандай оқибатларга олиб келишидан қатъи назар, келишувга тайёр. Бироқ Исроилнинг бир қатор хавфсизлик агентликлари бош вазирнинг коалициядаги айрим ўта ўнг вазирларнинг келишмовчилигини инобатга олиб, унинг тайёрлигига шубҳа билан қарамоқда.
Исроил молия вазири Безалел Смотрич сулҳга қатъиян қарши бўлиб, уни “таслим бўлиш” деб атаган. Аввалроқ мамлакат миллий хавфсизлик вазири Итамар Бен-Гвир ҳам сулҳга эътирозлар билдирган эди.
61 ёшли Яҳё Синвар 2023 йил октябрь ойида ҲАМАСнинг Исроилга уюштирган ҳужумининг ташкилотчиси ҳисобланади. Гуруҳ Синварнинг Сиёсий бюро раҳбари этиб сайланганини 6 август куни, Теҳронда Исмоил Ҳания ўлдирилганидан бир ҳафта ўтиб эълон қилган эди.
Синвар ҲАМАС сиёсий бюроси раҳбари этиб тайинлангач, Исроил ТИВ раҳбари Исроил Кац уни тезроқ йўқ қилишга чақирган эди.
Исмоил Ҳания ўрнига бош террорчи Яҳё Синварнинг ҲАМАСнинг янги раҳбари этиб тайинланиши уни имкон қадар тезроқ гумдон қилиш ва бу ёвуз ташкилотни Ер юзидан йўқ қилиш учун яна бир жиддий сабабдир, деб ёзган Кац.
Яҳё Синвар ҲАМАСнинг энг кўп қидирилаётган етакчилари рўйхатидан жой олган. Гуруҳнинг Исроилга ҳужумидан сўнг у омма олдида кўринмай қолган ва Ғазо остидаги ерости туннелларида яширинган деб тахмин қилинган.
Изоҳ (0)