Фаластиндан ташқаридаги ҲАМАС раҳбари Холид Машъал Исроил томонидан ўлдирилган Яҳё Синвардан сўнг ҳаракат раҳбари вазифасини бажармоқда. Бу ҳақда манбаларга таяниб, Ливаннинг ЛBCI телеканали хабар берди.
Исроил армияси 17 октябрь куни Ғазодаги операция чоғида ҳаракат етакчиси Яҳё Синвар ўлдирилганини маълум қилганди. Исроил аскарлари секторда патруллик қилаётганда тасодифан ҲАМАС раҳбари Яҳё Синварга дуч келган, деб ёзмоқда The New York Times.
“Патруллик пайтида Исроил бўлинмалари ҲАМАС вакиллари билан отишмага киришиб, бир нечта жангчи яширинган бинонинг бир қисмини вайрон қилган. Улар Синвар билан тўқнаш келишни кутмаган”, дейди манбалар.
Таъкидланишича, Холид Машъал эндиликда Исроил билан музокара олиб бориш ҳамда исроиллик гаровга олинганларни озод қилиш масалаларига масъул. ҲАМАС аллақачон Яҳё Синвар ўлдирилгани ҳақида Туркия, Қатар ва Миср ҳукуматини хабардор қилгани айтилмоқда.
Яҳё Синвар август ойида ҲАМАСга раҳбарлик қилди. Исроил армияси у ва гуруҳнинг яна икки аъзоси 16 октябрь куни Ғазо секторининг жанубида ўлдирилганини маълум қилди. Бунга далил сифатида Синвар ўлдирилишидан олдин дрон томонидан суратга олинган кадр намойиш қилинди.
Изоҳ (0)