Falastinning HAMAS harakatining G‘azodagi tashqi aloqalar bo‘limi rahbari Bassem Naim HAMAS yetakchisi Yahyo Sinvarning o‘limini tasdiqladi, deb xabar bermoqda Associated Press.
“Ha, yaqinlarimizni, ayniqsa yetakchi Yahyo Sinvarni yo‘qotish juda og‘riqli va achinarli, ammo biz oxir-oqibat g‘alaba qozonishimizga ishonchimiz komil”, deydi u.
Uning so‘zlariga ko‘ra, Isroil Sinvarning o‘limi HAMASga barham beradi, deb hisoblasa-da, aslida guruh yanada “kuchliroq bo‘ladi”.
Avvalroq Xolid Mash’al Sinvar o‘limidan so‘ng HAMAS harakati rahbari vazifasini bajarayotgani xabar berilgan edi. LBCI telekanali manbalariga ko‘ra, endi Mash’al G‘azodagi sulh bo‘yicha muzokaralarda ishtirok etayotgan asosiy tomonlar bilan barcha aloqalar uchun javobgardir.
Shuningdek, manbalar “HAMAS rahbariyati Turk, Qatar va Misr rasmiylarini Tel al-Sultondagi operatsiya chog‘ida uning siyosiy byurosi rahbari Yahyo Sinvarning o‘limi haqida xabardor qilgani”ni tasdiqlagan.
Oq uyning xabar berishicha, AQSH prezidenti Jo Bayden Isroil bosh vaziri Benyamin Netanyaxuni Sinvarning tugatilgani bilan tabriklagan va siyosatchilar G‘azo bo‘yicha muzokaralarni qayta boshlash imkoniyatlarini muhokama qilgan. O‘z navbatida, Netanyaxu yordamchisi va yana bir isroillik amaldor Axios’ga Sinvarning yo‘q qilinishi G‘azoda o‘t ochishni to‘xtatish evaziga garovga olinganlarni ozod qilish bo‘yicha bitim tuzish istiqbollarini ochib berishini ma’lum qilgan.
Izoh (0)