Янги йил кунида телевизор томошабинлари икки турга бўлинади: кимдир Гарри Поттернинг саргузаштлари ҳақидаги франшизанинг барча қисмларини томоша қилса, бошқалар Кевин Маккаллистер қандай қилиб ўғриларнинг таъзирини берганини қайта-қайта кўриб қувонади. Режиссёр Крис Колумбуснинг Янги йил арафасида тасодифан уйда ёлғиз қолган бола ҳақидаги комедия узоқ йиллардан бери энг севимли классикага айланган.
“Уйда ёлғиз” фильми экранларга чиққанига 30 йилдан ошди, аммо энг зийрак томошабинлар фильмдаги турли номутаносибликлар, хатоликлар ҳамда мантиқдан йироқ бўлган кадрларни пайқаган. Масалан, уйдаги баъзи предметларнинг йўқолиб, турли жойларда яна кўриниши, гараждаги ёруғликнинг ўз-ўзидан пайдо бўлиши, Кевиннинг ишламайдиган телефон орқали пицца буюртма қилиши, ўғрининг токка уланмаган дазмолдан куйиб қолиши бунга ёрқин мисолдир. Аммо мазкур комедиядаги яна бир катта хатоликни фақатгина америкалик томошабинлар аниқлаши мумкин.
Ўғриликка тушиш учун пайт пойлаётган вақтда Кевин уйида сохта кечки тадбир уюштиргани ёдингиздами? Ўша эпизодда уддабурон болакай хонадонда кўплаб инсонлар борлиги ҳақида тасаввур уйғотиш учун турли манекенлар ва картондан кесилган одамлар қиёфаси ёрдамида “зиёфат” ўтказади. Бир қарашда мазкур саҳнада ҳеч қандай хатолик йўқдек туюлади.
Аммо диққат қилинса, меҳмонлар билан гавжум уйнинг ёнида бирорта ҳам машина тўхтамаганини кўриш мумкин. Американинг Reddit форуми фойдаланувчилари бу фактни реалликдан узоқ деб атайди, чунки ўғрилар Кевиннинг кирдикорларига дарров ишонади. Аммо шунга қарамай, Гарри эртаси куни уйни яна бир бор текширишга қарор қилади. Эҳтимол, айнан машиналар йўқлиги учун Гарри Маккалистерларнинг Париждан қайтганига шубҳа қилгандир?
Изоҳ (0)