Суриянинг янги ҳукумати мактаб дастуридан эволюция ва Катта портлаш назариясини чиқариб ташлаш, шунингдек, Башар даврига оид эслатмаларни олиб ташлашни таклиф қилди.
Сурия ўтиш ҳукумати Таълим вазирлиги ислом қадриятларига асосланган янги ўқув дастурини эълон қилди. Унга кўра, “Миллатни ҳимоя қилиш” “Аллоҳни ҳимоя қилиш” ибораси билан алмаштирилади.
Мактаб таълими курсидан эволюция назарияси ва Катта портлаш назарияси, шунингдек, Башар Асад ва қадимги малика Палмира Зенобия даврига оид барча эслатмалар олиб ташланади. Вазирлик вакилларининг таъкидлашича, ҳозирча ўқув дастури ўзгаришсиз қолади, бироқ уни қайта кўриб чиқиш билан ихтисослаштирилган қўмиталар шуғулланади.
Араб тили курсларида Башар Асад ва унинг отаси Ҳофизни шарафловчи шеърлар ҳам олиб ташланди.
Ўзгаришлар баъзи сурияликлар томонидан мамнуният билан кутиб олинди.
Аммо бу ҳаракат қайта тикланаётган фуқаролик жамияти фаоллари орасида хавотир уйғотди. Фаоллар ўтиш даври ҳукуматининг Сурия жамиятининг барча қатламлари иштирокисиз таълим тизимига ёки бошқа давлат муассасасига ўзгартиришлар киритишга қаратилган ҳар қандай ҳаракатларига қарши эканини очиқ билдирмоқчи.
Расмийлар кўплаб турли жамоалар — насронийлардан тортиб курдлар, санъаткорлар ва зиёлилар билан учрашувлар ўтказмоқда. Хабарда айтилишича, улар жамиятнинг барча қатламларини жалб қилган ҳолда янги Сурияни яратишни хоҳлашади, шунда ҳамма мамлакат келажагидан манфаатдор бўлади.
Аммо фаолларнинг фикрича, мактаб ўқув дастуридаги бир томонлама ўзгаришлар бундай ваъдаларни пучга чиқаради.
Янги ташаббус мамлакатда ҳокимият ўзгариши билан боғлиқ: 8 декабрь куни Сурияда 24 йил давомида ҳокимият тепасида турган Башар Асад режими ағдарилди. Муваққат ҳукуматга “Ҳайъат Таҳрир аш-Шом” гуруҳи етакчисининг яқин сафдоши экани айтилаётган Муҳаммад ал-Башир бошчилик қилмоқда.
Изоҳ (0)