Yangi yil kunida televizor tomoshabinlari ikki turga bo‘linadi: kimdir Garri Potterning sarguzashtlari haqidagi franshizaning barcha qismlarini tomosha qilsa, boshqalar Kevin Makkallister qanday qilib o‘g‘rilarning ta’zirini berganini qayta-qayta ko‘rib quvonadi. Rejissyor Kris Kolumbusning Yangi yil arafasida tasodifan uyda yolg‘iz qolgan bola haqidagi komediya uzoq yillardan beri eng sevimli klassikaga aylangan.
“Uyda yolg‘iz” filmi ekranlarga chiqqaniga 30 yildan oshdi, ammo eng ziyrak tomoshabinlar filmdagi turli nomutanosibliklar, xatoliklar hamda mantiqdan yiroq bo‘lgan kadrlarni payqagan. Masalan, uydagi ba’zi predmetlarning yo‘qolib, turli joylarda yana ko‘rinishi, garajdagi yorug‘likning o‘z-o‘zidan paydo bo‘lishi, Kevinning ishlamaydigan telefon orqali pitssa buyurtma qilishi, o‘g‘rining tokka ulanmagan dazmoldan kuyib qolishi bunga yorqin misoldir. Ammo mazkur komediyadagi yana bir katta xatolikni faqatgina amerikalik tomoshabinlar aniqlashi mumkin.
O‘g‘rilikka tushish uchun payt poylayotgan vaqtda Kevin uyida soxta kechki tadbir uyushtirgani yodingizdami? O‘sha epizodda uddaburon bolakay xonadonda ko‘plab insonlar borligi haqida tasavvur uyg‘otish uchun turli manekenlar va kartondan kesilgan odamlar qiyofasi yordamida “ziyofat” o‘tkazadi. Bir qarashda mazkur sahnada hech qanday xatolik yo‘qdek tuyuladi.
Ammo diqqat qilinsa, mehmonlar bilan gavjum uyning yonida birorta ham mashina to‘xtamaganini ko‘rish mumkin. Amerikaning Reddit forumi foydalanuvchilari bu faktni reallikdan uzoq deb ataydi, chunki o‘g‘rilar Kevinning kirdikorlariga darrov ishonadi. Ammo shunga qaramay, Garri ertasi kuni uyni yana bir bor tekshirishga qaror qiladi. Ehtimol, aynan mashinalar yo‘qligi uchun Garri Makkalisterlarning Parijdan qaytganiga shubha qilgandir?
Izoh (0)