Турли жанжал, можароларга аралашиш ёки номақбул хатти-ҳаракатлар қилиш орқали энг машҳур ва ҳурматга сазовор актёрларнинг ҳам карьерасига нуқта қўйиши мумкин. Қуйида турли сабаблар туфайли Голливуднинг “қора рўйхати”га тушган санъаткорлар ҳақида маълумот берамиз.
Ванесса Маркес
1990 йилларда Ванесса Маркес машҳур “Тез ёрдам” сериалида ҳамшира Венди Голдман ролини ижро этган. Унинг сўзларига кўра, ушбу сериални суратга олиш жараёнида юз берган тажовузлар ҳақида очиқ гапирганидан сўнг, актёр Жорж Клуни унинг Голливуддаги карьераси бузилиб кетишига сабабчи бўлган. Бироқ Клуни бу айбловларни кескин рад этган:
“Мен бу лойиҳада шунчаки актёрлардан бири эдим ва фақатгина актёр бўлиб ишладим. Унинг карьерасига салбий таъсир қилганим ҳақидаги гапларнинг бари ёлғон. Мен саноатда бундай катта таъсирга эга одам эмасман ва ҳеч қачон бундай қилмаганман” дея раддия билдирган эди актёр.
Сериалдаги роли тугагач, Ванесса фақат кичик лойиҳаларга таклиф қилинди. 2018 йил август ойида у полициячи томонидан отилган ўқ туфайли тасодифан ўз уйида фожиали равишда вафот этди.
Мел Гибсон
2006 йилда Мел Гибсон маст ҳолда машина бошқаргани учун қўлга олинганда айтган антисемитик сўзлари сабаб обрўйига путур етди. Ушбу воқеадан сўнг, у Голливудда персона нон грата одамга айланди.
2006 йилдан 2010 йилгача Гибсон фақат битта фильм — “Зулмат чегараси”да рол ўйнади. 2010 йилда эса собиқ ҳамкори Оксана Григоревага таҳдид қилгани сабабли яна бир можаро марказида қолди. Шу сабабли Виллиам Моррис Endeavor Entertainment номли истеъдодларни қўллаб-қувватлаш агентлиги у билан шартномани бекор қилди. Бу воқеа унинг кино саноатидаги имкониятларини кескин камайтириб юборди.
Аммо сўнгги йилларда Гибсон карьерасини тиклашга муваффақ бўлди. Унинг “Виждонан” номли режиссёрлик иши танқидчилар томонидан юқори баҳоланди ва “Оскар” мукофотининг олтита номинациясини қўлга киритди. Бу ютуқ унинг Голливуддаги обрўсини тиклаш йўлидаги муҳим қадам бўлди.
Мира Сорвино
Мира Сорвино Голливуднинг қора рўйхатига тушган машҳур юлдузлардан бири. Бунга сабаб унинг кинопродюсер Ҳарви Вайнштейннинг жинсий тажовузига учраганини айтиши ва бунга қарши бўлиши сабаб бўлди. Актриса журналист Ронан Ферроуга берган интервьюсида Вайнштейнга бир неча бор рад жавобини бергани ва Мирамах компаниясининг бошқа ҳамкасбларига унинг хатти-ҳаракатлари ҳақида маълум қилганини айтган. Бу воқеа, афсуски, унинг карьерасига салбий таъсир қилган.
2017 йилда режиссёр Питер Жексон Вайнштейн Сорвинони обрўсизлантиришга ҳаракат қилганини тасдиқлаган. У Жексонни актриса билан ишламасликка кўндирган ва шу тариқа Сорвинонинг карьераси таназзулга учраган.
Чарли Шин
Чарли Шин бир пайтлар Голливуднинг энг машҳур юлдузларидан бири эди, аммо 2014 йилдан кейин унинг карьераси жиддий қийинчиликларга дуч келди. “Ғазабни бошқариш” лойиҳасида ишлагандан сўнг, унга янги иш топиш қийин бўлиб қолди. Актёр ҳатто судга мурожаат қилиб, собиқ рафиқаларига алимент миқдорини камайтиришни сўраган. Чунки кўплаб кўнгилочар соҳаларда актёрга эшиклар ёпилган эди.
Эшли Жадд
Эшли Жадд ҳам Вайнштейннинг ахлоқсиз хулқидан азият чеккан актрисалардан биридир. Питер Жексоннинг айтишича, Вайнштейн уни “жуда мураккаб характерли ва инжиқ актриса” деб таърифлаган ва Жадд билан ишлаш жуда мураккаб эканлиги ҳақида бошқа режиссёрларга уқтирган. Шу сабабли актриса “Узуклар ҳукмдори” трилогиясида ҳеч қандай рол берилмаган. 2018 йилда Жадд Вайнштейнни туҳматда айблаб, уни судга берган.
Роуз Макгоуэн
“Сеҳрланганлар” сериалидаги роли билан танилган Роуз Макгоуэн ҳам Вайнштейннинг босими туфайли қора рўйхатга тушганини айтади. Актрисанинг сўзларига кўра, 1990 йилларда Вайнштейн унга нисбатан жинсий зўравонлик қилган. Аммо улар келишиб олишган ва суд иши очиш ўрнига 100 минг доллар компенсация олишга актриса рози бўлган. Бироқ бу воқеа унинг карьерасига жиддий зарба берган.
Роузни қайта Голливудга қайтаришга режиссёр Роберт Родригез ҳаракат қилган, аммо уринишлар муваффақиятсиз бўлган.
Кетрин Ҳейгл
Кетрин Хейгл бир пайтлар таниқли актриса бўлган, аммо ҳозир унинг карьераси қониқарсиз аҳволда. Унинг суратга олиш майдончадаги хулқ-атвори бунга сабаб бўлгани ҳақида турли миш-мишлар мавжуд. Баъзи актёрлар унинг талаблари ҳаддан ортиқ кўп бўлгани туфайли кўплаб лойиҳаларда иштирок этмаётганини таъкидлайди.
Изоҳ (0)