2024 йил ҳам ўз якунига етиб бормоқда, ҳадемай Янги йил байрами ҳам кириб келади. Биз эса совуқ кунларда сизга байрамона кайфият улашадиган қиш фасли ҳақидаги энг яхши фильмларни намойиш этамиз.
“Таътилда ёлғиз”
Болалигимизда ҳар қандай таътилни катталарсиз ўтказиш бизга жуда ҳам қизиқарли туюлган. Ава ҳам худди шундай фикрда бўлади, аммо қизалоқ ва унинг дўстлари ота-оналарсиз катта меҳмонхонада Рождество байрамини ўтказгандан сўнг, бу фикрдан қайтади ва ота-онасини ўз хоҳишларидан қутқаришига тўғри келади.
“Совға учун Рождество”
Янги йил мўжизаси йилнинг бошқа фаслларида ҳам содир бўладими? Баъзи болалар ушбу оилавий байрамни ёз фаслида бўлишини орзу қилади. Мазкур фильмда бу истак ҳақиқатга айланади. Сюжетга кўра, август ойида Янги йил байрами кириб келади, бунга меҳрибон бобонинг набирасига бўлган муҳаббати сабаб бўлади.
“Уйда ёлғизлар”
Йўқ, бу сиз ўйлаган Кевин Маккалистер саргузаштлари ҳақидаги франшиза эмас, мазкур фильмда дунёдаги энг ақлли мавжудотлар — итлар тўғрисида сўз боради.
Роберт исмли ажойиб ихтирочининг уйига Рождество арафасида икки ўғри бостириб киришга ҳаракат қилади. Гаджетлар билан қуролланган уй ҳайвонлари эса Робертнинг мулкини ҳимоя қилиш учун шай туради.
“Теддининг саргузаштлари”
Янги йил ярмаркасида Марианна сўзлаша оладиган ўйинчоқ — айиқча Теддини кўриб қолади. Бу унинг болалигидан орзу қилган нарсаси бўлади. Бироқ бошқа харидор айиқни ютиб олади. Сўнг Тедди ва унинг янги дўсти қизалоқни топиш учун саргузаштларга тўла Янги йил саёҳатига йўл олади.
“Ўйинчоқ қуён”
Уилям исмли болакай Янги йил байрамига совға сифатида ўйинчоқ қуён олади ва у ҳақиқий қуёнга айланиб, дўсти билан Янги йил сеҳрларига тўла ажойиб кунларни бошидан кечиради.
“Бизнинг кичик сиримиз”
Фильмда Эйвери исмли қаҳрамон навбатдаги Рождество байрамини қаллиғининг оиласи билан ўтказишга қарор қилади, лекин унинг собиқ турмуш ўртоғи ҳам байрам тантаналарида қатнашаётганини билиб, уларнинг романтик тарихини барчадан яширишга мажбур бўлади.
“Охирги Рождество байрамида”
Кейт Рождество совғалари сотиладиган дўконда ишлайди, кўп спиртли ичимликлар истеъмол қилади ва анчадан бери шахсий ҳаёти ҳақида қайғурмай қўйган бўлади. Аммо келишган ва ёқимтой Том билан учрашгандан кейин ҳамма нарса ўзгаради.
“Қизил топшириқ”
“Қизил” махфий исмли Санта Клаус ўғирлаб кетилади. Шимолий қутбдаги хавфсизлик хизмати бошлиғи Қорбобони қутқариш учун дунёдаги энг машҳур ёвуз одам билан ҳамкорлик қилишга тўғри келади. Улар биргаликда Рождествони қутқариш учун бутун дунё бўйлаб қизил миссияни бошлайдилар.
“Жин”
Бернарднинг ҳаёти орқага кета бошлайди: иши туфайли у қизининг туғилган кунини ўтказиб юборади, хотини уни ташлаб кетади, сўнг ишдан бўшатилади. Остонада энг оилавий байрам — Янги йил яқинлашиб келади. Қишнинг сўнгги кунларида тасодифан Бернард қадимий қутини топиб олади ва ундан жин чиқади.
“Ширинликлар кўчаси”
Ҳар йили Крис қўшнилари билан рақобатлашиб, байрам учун уйнинг энг яхши безаклари танловида ғолиб чиқишга ҳаракат қилади. Ғалаба қозониш учун у Pepper исмли элф билан шартнома тузади, унинг сеҳри бутун шаҳарда тартибсизликка олиб келади. Энди бу сеҳрни бузиш ва Рождествони сақлаб қолиш Крис ва унинг оиласи қўлида қолади.
Изоҳ (0)