Ўзбекистонда 2025 йил 1 февралдан бошлаб темирйўл чипталари нархи оширилади. Бу ҳақда “Ўзбекистон темир йўллари” АЖ матбуот хизмати хабар берди.
Қайд этилишича, соҳада темир йўл инфратузилмаси харажатлари, электр энергияси, ёқилғи ва транспорт харажатларини қоплаш, шунингдек, янги юқори тезликда ҳаракатланувчи электропоездларни харид қилиш ва йўловчи вагонлари паркини янгилаш, темирйўл вокзаллари фаолиятини янгича замонавий талабларига мувофиқ олиб бориш ва йўловчиларга сифатли хизмат кўрсатиш мақсад қилинган.
Шу сабабли юқори тезликда ҳаракатланувчи “Афросиёб” электропоездларнинг VIP, бизнес тоифадаги чипта нархлари 25 фоизга, эконом тоифадаги чипта нархлари 20 фоизга ҳамда тезюрар йўловчи поездлар “Шарқ”, “Насаф” ва “Ўзбекистон” поездларнинг чипта нархлари 30 фоизга оширилмоқда.
“Афросиёб” электропоездларни чипта нархлари қуйидагича:
Тошкент—Бухоро
- VIP 994 000 сўм;
- бизнес 751 000 сўм;
- эконом 484 000 сўм;
Тошкент—Қарши
- VIP 854 000 сўм;
- бизнес 634 000 сўм;
- эконом 406 000 сўм.
Тошкент—Самарқанд
- VIP 619 000 сўм;
- бизнес 450 000 сўм;
- эконом 294 000 сўм.
Шунингдек, 2025 йил 1 февралдан бошлаб маҳаллий йўналишдаги (ётоқли) йўловчи поездлар чипта нархининг тариф қисми 10,5 фоизга оширмоқда.
Нархлар аввал қанчага оширилганди?
Президентнинг 2023 йил 10 октябрдаги “Ўзбекистон Республикаси темирйўл транспорти соҳасини тубдан ислоҳ қилиш чора-тадбирлари тўғрисида”ги қарорига мувофиқ 2024 йил 1 январдан бошлаб юқори тезликдаги ва тезюрар поездларда йўловчиларни ташиш хизматлари тарифларини давлат томонидан тартибга солиш амалиётидан воз кечиш, шунингдек, уларни бозор тамойиллари асосида тартибга солиш механизмига ўтиш амалга оширилган.
2024 йил 20 январдан бошлаб юқори тезликда ҳаракатланувчи “Афросиёб” электропоездлари ҳамда “Шарқ”, “Насаф” ва “Ўзбекистон” тезюрар поездларининг чипталар нархи 20 фоизга оширилганди. 15 майдан бошлаб эса “Афросиёб” электропоездларининг чипталар нархи эконом класс 20 фоиз, бизнес класс 30 фоиз ва VIP класс 40 фоиз миқдорда ошганди.
2024 йил 1 июлдан маҳаллий йўналишлардаги йўловчи поездлар — “Насаф”, “Шарқ”, “Ўзбекистон” поездлари чипта нархларининг тариф қисми 25 фоизга оширилганди.
Изоҳ (0)