Россия ва Озарбайжон ҳуқуқ-тартибот идораларига Қозоғистон Жиноят процессуал кодексига мувофиқ жиноят иши бўйича терговда иштирок этишга рухсат этилмайди. Бу ҳақда Қозоғистон бош вазири ўринбосари Канат Бозумбаев Оқтовда бўлиб ўтган брифингда маълум қилган.
“Россия ва Озарбайжон ҳуқуқ-тартибот идоралари криминалистик терговда иштирок эта олмайди, бироқ уларга авиаҳалокатни тергов қилишга рухсат берилади”, деди у.
25 декабрь куни Бокудан Грознийга учаётган Azerbaijan Airlines компаниясининг Embraer самолёти Қозоғистоннинг Оқтов шаҳри яқинида ҳалокатга учраган эди. Самолёт бортида 62 нафар йўловчи, жумладан, 37 нафар Озарбайжон, 16 нафар Россия, 6 нафар Қозоғистон ва 3 нафар Қирғизистон фуқароси ҳамда беш нафар экипаж аъзоси бўлган. Ҳодиса оқибатида 38 нафар йўловчи ҳалок бўлди, 29 киши, жумладан, уч нафар бола тирик қолди.
Президент Илҳом Алиевнинг фармойишига кўра, Озарбайжонда 2024 йил 26 декабрь куни авиаҳалокатда ҳалок бўлганлар хотирасига мотам эълон қилинди.
Euronews телеканали Озарбайжон ҳукуматидаги манбаларига таяниб самолётининг ҳалокатига Россия ракетаси сабаб бўлганини маълум қилди.
Дастлабки маълумотларига кўра, Грозний устидан учиб бораётган вақтда самолётга ҳаво мудофаа тизими билан зарба берилган. Зенит ракета ҳаводаги самолёт ёнида портлаб, металл парчалар экипаж ва йўловчиларни жароҳатлаган. Бироқ учувчиларнинг фавқулодда қўниш ҳақидаги сўровларига қарамай, Россиянинг бирорта аэропортига қўнишга рухсат бермаган. Шундан сўнг экипажга Каспий денгизи орқали Қозоғистоннинг Оқтов шаҳри томон учиш буюрилган.
Маълум қилинишича, Россия армияси томонидан қўлланилган радиотўлқинли қуроллар самолётнинг GPS навигация тизимига зарар етказган.
Ракета Панцирь-С ҳаво мудофаа тизимидан учирилган, деб хабар бермоқда АнеwЗ нашри Озарбайжон ҳукуматидаги манбаларига таяниб.
Изоҳ (0)