Шавкат Мирзиёев 26 декабрь куни бўлиб ўтган телефон орқали мулоқотда Озарбайжон президенти Илҳом Алиевга Қозоғистоннинг Оқтов шаҳри яқинида йўловчи самолёти ҳалокати оқибатида кўплаб инсонлар қурбон бўлгани муносабати билан чуқур ҳамдардлик билдирди.
Президент матбуот хизматининг билидиришича, давлат раҳбари Озарбайжон етакчиси орқали ҳалок бўлганларнинг оила аъзолари ва яқинларига самимий ҳамдардлик ва далда сўзларини йўллади, жабрланганларнинг барчаси тез фурсатда соғайиб кетишини тилади.
Ўзбекистон президенти самолёт ҳалокатга учрагани муносабати билан Озарбайжон ва Россия президентларига 25 декабрь куни ҳам ҳамдардлик йўллаганди.
Қозоғистондаги авиаҳалокат
Бокудан Грознийга учаётган Embraer 190 йўловчи самолёти 25 декабрь куни Қозоғистоннинг Оқтов шаҳрида қулаб тушганди. Самолёт Azerbaijan Airlines авиакомпаниясига тегишли бўлиб, бортида 69 киши, жумладан, 5 нафар экипаж аъзоси бўлган.
Қозоғистон бош вазири ўринбосари Канат Бозумбаев ҳодиса оқибатида 38 киши ҳалок бўлганини маълум қилди. Қосим-Жўмарт Тўқаев самолёт ҳалокатини текшириш бўйича комиссия тузишни буюрган.
Озарбайжон президенти Илҳом Алиев авиафожиа муносабати билан Россиядаги МДҲ саммитига қатнашмай, Бокуга қайтган. У Azerbaijan Airlines самолётининг Оқтовда қулаши сабаблари номаълумлигини, шу билан бирга авиаҳалокат бўйича турли тахминлар мавжудлигини айтди.
Озарбайжон президентининг сўзларига кўра, ҳодиса сабаблари ҳақида гапиришга ҳали эрта, масалани тўлиқ текшириш керак. Алиев, шунингдек, Озарбайжон Бош прокуратураси авиаҳалокат юзасидан жиноий иш очганини айтди.
Изоҳ (0)