Индонезияда ҳалокатга учраган Sriwijaya Air авиакомпаниясининг Boeing 737-524 йўловчи самолёти сувга урилиш оқибатида парчаланиб кетган бўлиши мумкин. Бу ҳақда Straits Times газетаси Транспортда хавфсизлик бўйича миллий комиссиянинг авиация хавфсизлигини текшириш бўлими раҳбари Нуркахио Утомога таяниб хабар берди, деб ёзади «РБК».
«Дастлабки маълумотлар самолёт сувга келиб урилган пайтда парчаланиб кетганини кўрсатмоқда», — деди у.
Утомонинг қўшимча қилишича, агар самолёт ҳавода парчаланганида, унинг бўлаклари каттароқ майдон бўйлаб сочилган бўларди.
Авиаҳалокат 9 январь куни содир бўлди, лайнер Мале ороли яқинида Яван денгизида ҳалокатга учради. Унинг бортида 62 киши: 50 нафар йўловчи, шу жумладан, ўн нафар бола, шунингдек, 12 нафар экипаж аъзоси бор эди, уларнинг барчаси ҳалок бўлди.
СЖ182 рейсини амалга ошираётган лайнер Индонезиянинг Ғарбий Калимантан провинцияси маъмурий маркази бўлган Понтианак шаҳрига йўл олган. Самолёт маҳаллий вақт билан 14:36 да Жакартадан учиб чиққанидан кейин дарҳол радарлардан ғойиб бўлган ва диспетчерларга жавоб бермай қўйган.
Кейинроқ Метеорология, иқлим ва геофизика агентлиги вакили Дени Септиади самолёт кучли турбулентлик зонасига тушиб қолганини маълум қилди.
Изоҳ (0)