Американинг Boeing авиасозлик компанияси 2020 йилда кўрган соф зарар 11,94 миллиард долларга тенг бўлди, деб ёзади Meduza компания ҳисоботига таяниб.
2019 йилни Boeing 636 миллион доллар зарар билан якунлаган эди. Бир йил ичида у 19 марта ошиб, компаниянинг бутун тарихи давомидаги рекорд кўрсаткичга айланди.
Boeing’нинг даромади бир йил ичида 24 фоизга — 58,2 миллиард долларгача тушиб кетди.
Корпорациянинг молиявий муаммолари пандемия даврида самолётларга талабнинг пасайиши, шунингдек, Boeing 737 МАХ лайнери парвозига қўйилган бир ярим йиллик тақиқ билан боғлиқ.
Boeing бош директори Дэвид Кэлхун 2020 йилни авиация тармоғи учун «ўта оғир йил» деб атади. «Авиаташувлар 2019 йилдаги даражага қайтиши учун тахминан уч йил, бизга эса узоқ муддатли ўсиш тенденцияларига қайтиш учун яна бир неча йил керак бўлади, деб ўйлаяпмиз», — деди у.
737 МАХ лайнеридан фойдаланиш 2019 йилнинг мартида иккита авиаҳалокатдан кейин бутун дунё бўйлаб тўхтатилган эди. Boeing ҳалокатларга сабаб бўлган софтни тузатиш учун 737 МАХъни ишлаб чиқаришни тўхтатди. АҚШда лайнернинг парвозлари 2020 йил декабрида қайта тикланди; Евроиттифоқда уларга 2021 йил январида рухсат берилди.
2020 йилда Boeing самолётларни етказиб бериш бўйича 43 йил ичидаги антирекордни қайд этди. Корпорацияга бор-йўғи 157 та лайнер учун буюртма берилди, бу 2019 йилдагидан 60 фоизга кам демакдир. Таққослаш учун, Boeing рақобатдоши Airbus 2020 йилда мижозларига 566 та самолёт етказиб берган.
Мавзуга доир:
- Экспертлар 2020 йилни авиация тарихидаги энг ёмон давр деб атади
- Иккита авиаҳалокатдан сўнг биринчи марта Boeing 737 МАХ самолёти йўловчилар билан парвоз қилди
- Бразилия авиакомпанияси икки авиаҳалокатдан сўнг дунёда биринчи бўлиб Boeing 737-8 МАХ самолётлари парвозини тиклади
- АҚШ Boeing 737 МАХ ҳаво кемаларининг парвозига рухсат берди. Парвозлар иккита авиаҳалокат сабаб 1,5 йил олдин тўхтатилганди
- Boeing компанияси иккита авиаҳалокатдан кейин тўхтаб қолган 737 МАХ моделларини қайта йиғишни бошлади
Изоҳ (0)