Qozog‘iston prezidenti Qosim-Jo‘mart To‘qayev Oqtovdagi aviahalokat bo‘yicha yig‘ilish o‘tkazdi.
Unda To‘qayev Ozarbayjonning Embraer 190 samolyoti halokatga uchragani haqida dezinformatsiya va provokatsiyalar tarqalishiga yo‘l qo‘ymaslik muhimligini ta’kidladi.
Mazkur yig‘ilishda Qozog‘iston yetakchisi butun mamlakat bo‘ylab halokat munosabati bilan aviatsiya xavfsizligini tekshirishni boshlash lozimligini qayd etdi. U, shuningdek, hukumat komissiyasi va bosh prokuraturaga falokatni har tomonlama tekshirishni ta’minlashni topshirdi. Siyosatchi hukumatga samolyot halokatining oqibatlarini bartaraf etishda mardlik va mahorat ko‘rsatganlarni mukofotlashni buyurdi.
25-dekabr kuni AZAL kompaniyasiga tegishli Embraer 190 yo‘lovchi samolyoti Boku—Grozniy yo‘nalishi bo‘ylab uchib, Oqtov aeroportidan 3 kilometr uzoqlikda qulagan edi.
Samolyot bortida 67 kishi, xususan, 62 nafar yo‘lovchi va 5 nafar ekipaj a’zosi bo‘lgan. Ulardan 38 nafari halok bo‘lgan, 29 nafari omon qoldi. Ekipajning ikkala uchuvchisi va styuardessa halok bo‘ldi.
Azerbaijan Airlines (AZAL) kompaniyasi Qozog‘istonning Oqtov shahri yaqinida qulagan samolyotning halokatiga “tashqi jismoniy va texnik ta’sir” sabab bo‘lganini ma’lum qildi.
“Ozarbayjon fuqaro aviatsiyasi davlat agentligi bilan kelishilgan holda Rossiyaning bir qator shaharlariga Bokudan parvozlarni bekor qilish to‘g‘risida qaror qabul qildi. Bunga Embraer 190 samolyoti halokati bo‘yicha tergovning dastlabki natijalari asos bo‘ldi. Unga ko‘ra Boku—Grozniy reysini amalga oshirayotgan, Oqtov shahri yaqinida qulagan samolyot halokatiga jismoniy va texnik tashqi ta’sir sabab bo‘lgani aniqlandi”, deyiladi aviakompaniya bayonotida.
Euronews telekanali Ozarbayjon samolyotining halokatiga Rossiya raketasi sabab bo‘lganini xabar qilgan. Reuters agentligi esa mazkur samolyotni Rossiyaning “Pantsir-S” mudofaa tizimi qulatgani haqida maqola e’lon qilgan.
Rossiya aviatsiyasi rahbari bergan bayonotida halokatga Ukraina dronlari va quyuq tumanni sabab qilib ko‘rsatgan.
“AZAL samolyoti ob-havo sharoiti (500 metr balandlikda ko‘rinishni yomonlashtirgan tuman) va “Ukrainaning hujumlari” tufayli joriy etilgan reja sababli Grozniyga qo‘na olmagan. Samolyotni qo‘ndirishga ikki marta urinishdan so‘ng, havo kemasi komandiri, unga boshqa variantlar taklif qilinishiga qaramay, Qozog‘istonga uchishga qaror qilgan”, deyiladi Dmitriy Yadrov bayonotida.
Izoh (0)