21 март куни Хитой жанубида ҳалокатга учраган Boeing 737 самолёти борт ўзиёзарларидан олинган маълумотлар у атайлаб ерга қулатилганини тасдиқлаш имконини беради. Ҳалокат сабабларини ўрганиш билан шуғулланаётган америкалик экспертлар шундай хулосага келди, деб ёзади Meduza.
Борт ўзиёзарлари маълумотларига қараганда, баландликни кескин пасайтириш ҳақидаги буйруқ учувчилар кабинасида бўлган бир одам томонидан берилган. «Самолёт кабинадаги одам нима деган бўлса, шуни қилган», — деб The Wall Street Journal манбаси маълум қилган. Америкалик экспертлар энди текширув ишларини учувчиларнинг хатти-ҳаракатларига қаратди, аммо кабинага бегона одам кириб, самолётни ерга йўналтиргани истисно қилинмаяпти.
Авиаҳалокат сабабларини ўрганаётган хитойлик авиаэкспертлар самолёт ҳалокатини келтириб чиқариши мумкин бўлган ҳеч қандай техник носозликларни аниқламаган.
Кунминдан Гуанчжоуга рейсни амалга ошираётган China Eastern Airlines авиакомпанияси самолёти 21 март куни Хитой жанубидаги тоғли ҳудудда қулаб тушганди. Бортдаги 133 кишининг барчаси ҳалок бўлди.
2015 йил 24 март куни Франция жанубидаги Алп тоғларида Germanwings авиакомпаниясининг йўловчи самолёти ҳалокатга учраганди. Суриштирув чоғида самолёт кабинада ёлғиз қолган иккинчи учувчи Andreas Lyubits томонидан қасддан ерга йўналтирилгани аниқланди. Биринчи учувчи ичкарига кириб, ҳалокатнинг олдини ололмаслиги учун у кабина эшигини қулфлаб қўйган.
Авиаҳалокат оқибатида 150 киши қурбон бўлганди. Любиц саломатлиги туфайли учувчилик касбини тез орада тарк этмоқчи бўлгани аниқланган. Шунингдек, у депрессиядан даволангани маълум бўлган. Ўз саломатлиги билан боғлиқ муаммоларни Любиц авиакомпаниядан бекитган. Самолёт ҳалокатидан кейин Евроиттифоқда ва бошқа қатор мамлакатларда парвозлар хавфсизлиги қоидалари қайта кўриб чиқилганди.
Изоҳ (0)