Иккита авиаҳалокатдан сўнг биринчи марта Boeing 737 МАХ самолёти йўловчилар билан парвоз қилди

American Airlines Group Inc авиакомпанияси иккита авиаҳалокатдан кейин тўхтатиб қўйилган Boeing 737 МАХ самолётлари парвозини тиклади, деб хабар бермоқда «Интерфакс».

Қайд этилишича, биринчи рейс Майамидан Нью-Йоркка амалга оширилган, йўловчилар орасида авиакомпания президенти Роберт Айсом ҳам бўлган.

Авиакомпания маълум қилишича, АҚШ фуқаролик авиацияси федерал бошқармаси (Federal Aviation Administration, FAA) ноябрда тегишли рухсатномани тақдим этганидан кейин, энди Boeing 737 МАХ’ни аста-секинлик билан эксплуатацияга қайтаришни режалаштирмоқда.

Шунингдек, авиакомпания йўловчиларга рейс қайси самолётда амалга оширилиши ҳақида қўшимча маълумот беришни бошлаган, бу улар МАХ самолётида амалга ошириладиган парвоз ҳақида олдиндан хабардор бўлиши учундир.

Эслатиб ўтамиз, 2019 йилнинг 10 март куни Ethiopian Airlines авиакомпаниясининг Кенияга учаётган Boeing 737-800 МАХ самолёти ҳалокатга учраши оқибатида бортда бўлган 149 нафар йўловчи, шунингдек, саккиз нафар экипаж аъзоси ҳалок бўлган. 2018 йилнинг 29 ноябрь куни Lion Air авиакомпаниясининг Boeing 737 йўловчи самолёти Жакарта аэропортидан ҳавога кўтарилганидан кўп ўтмай ҳалокатга учраб, денгизга қулаган. Самолёт бортида 189 киши бўлган. Шулардан 181 нафари йўловчи, 2 нафар учувчи ҳамда 6 нафар экипаж аъзоси. Уларнинг барчаси ҳалок бўлган.

Аввалроқ АҚШ ушбу самолётлар парвозига рухсат бергани ҳақида хабар берилганди. Бразилия авиакомпанияси эса икки авиаҳалокатдан сўнг дунёда биринчи бўлиб Boeing 737-8 МАХ самолётлари парвозини тиклаган эди.