Жорий йил 25 декабрь куни Бокудан Грознийга учаётган Embraer 190 йўловчи самолёти Қозоғистоннинг Оқтов шаҳрида қулаб тушди. Бу даҳшатли фожиа сабабларини ўрганиш ҳали ҳам давом этаётган бўлса-да, мазкур авиаҳалокат ҳаттоки энг ишончли транспорт турларидан бири бўлган самолётда ҳам хавфсизлик масаласи жуда муҳим эканлигини ёдга солди.
Афсуски, йўловчилар самолёт бортида ёки иш тизимида бирор кор ҳол юзага келишининг олдини ололмайди, аммо самолётда энг хавфсиз ўриндиқларни танлаш орқали ўлим хавфини камайтириш имконига эга бўлади. Қуйида Travel Leisure маълумотларига асосланиб самолёт хавфсизлик қоидалари ҳақида маълумот берамиз.
Самолётнинг қайси қисми хавфсизроқ?
Мутахассисларнинг фикрича, бортдаги энг хавфсиз жой самолётнинг орқа томондаги учдан бир қисмидир. АҚШ Фуқаролик Авиация бошқармаси (FAA) нинг 35 йиллик маълумотларига асосланган тадқиқотга кўра, ушбу қисмдаги ўлим хавфи 32 фоизни ташкил этади. Таққослаш учун, ўрта қисмда бу кўрсаткич 38 фоизга, олд қисмида эса 39 фоизга ошади.
Самолёт орқа томони, учдан бир қисмидаги энг марказий ўриндиқлар хавфсизлик жиҳатдан алоҳида ажралиб туради (тўқ яшил рангда белгиланган) Бу томонда ўлим кўрсаткичи ўртача 28 фоизни ташкил қилади. Самолётнинг ўрта қисмдаги ўриндиқлар эса энг хавфли деб топилди, уларнинг ўлимга олиб келиш хавфи ўртача 44 фоиздир.
Самолёт бортида омон қолиш имкониятини оширишнинг яна бир варианти бор: бунинг учун фавқулодда чиқиш жойи яқинидаги ўриндиқларни танлаш керак. Қоидага кўра, фавқулодда ҳодисаларда самолёт 90 сония ичида тўлиқ эвакуация қилиниши керак. 100 дан ортиқ авиаҳалокатлар таҳлили ушбу маълумотни тасдиқлайди.
Истисно ҳолатлар
Барча статистик маълумотлар шу вақтгача бўлиб ўтган воқеалар ҳақидаги маълумотлар асосида умумлаштиради, лекин истисно вазиятлар ҳам мавжуд. Масалан, 1989 йилда United Airlines 232 рейси ҳалокатга учраганида, тирик қолганларнинг аксарияти самолётнинг ўрта қисмида бўлган:
1977 йилда Tenerife фожиасида 61 нафар тирик қолганлар асосан олд ўриндиқларда бўлган. Бундай мисоллар фавқулодда вазиятлар доимо фарқ қилиши мумкинлигини билдиради.
Хавфсизлик бўйича тавсиялар
Парвоз пайтида хавфсизликни таъминлаш учун қуйидаги оддий тавсияларга амал қилиш лозим:
- Стюардессаларнинг барча кўрсатмаларини доимо диққат билан тингланг ва эвакуация пайтида ҳеч қачон буюмларингизни олишга уринманг. Ҳалокат пайтида асосий мақсад самолётни имкон қадар тезроқ тарк этишдир;
- Олд ўриндиқ чўнтагида жойлашган хавфсизлик ҳақидаги қўлланмани олдиндан ўқиб чиқинг;
- Фавқулодда ҳодисада чироқлар ўчиши мумкин, шу сабабли чиқиш эшигидан то ўриндиққача нечта қатор борлигини аввалдан санаб қўйинг.
Изоҳ (0)