Қозоғистонда қулаган Azerbaijan Airlines самолётининг бошқарув тизимлари ишдан чиққан бўлган. Экипаж йўналиш ва баландликни барқарор сақлаб тура олмаган. Қозоғистон транспорт вазири Марат Қарабоев воқеалар кетма-кетлигини келтирди.
Дастлабки хабар соат 10:43 да Ростов ҳудудий диспетчеридан Ақтўбе туман диспетчерлик марказига келиб тушган. Унда Embraer-190 самолётини Грознийдан захира аэродромига йўналтириш ҳақида маълумот берилган. Самолётнинг бошқарув тизимлари, баландлик рули ва элеронлари Қозоғистон ҳаво ҳудудига кирмасдан олдинроқ ишдан чиққан.
“Ростов диспетчери Махачқалъа ва Бокудаги об-ҳаво маълумотлари тақдим этилгандан сўнг, экипаж Оқтов шаҳрига учишга қарор қилганини хабар қилди”, деди Қарабоев.
Соат 10:53 да Ростовдаги парвоз раҳбари Оқтов минорасидаги парвоз раҳбарига қўшимча маълумот етказган. Унга кўра, самолётнинг йўловчилар салонидаги кислород баллони портлаб кетган, йўловчилар ҳушини йўқота бошлаган. Самолёт етиб келгач, реанимация хизмати сўралган. Фавқулодда вазият хизматлари самолёт Қозоғистон ҳаво ҳудудига киришидан олдиноқ уни қабул қилишга шай турган.
Диспетчер кемани аэродромга қўндириш учун барча зарур ҳаракатларни амалга оширган. Бундан ташқари, учиш-қўниш йўлагини кўришни осонлаштириш мақсадида чироқлар ёқилган.
Экипаж Оқтов аэродромининг учиш-қўниш йўлагига икки марта қўнишга уринган, бунда авиакеманинг баландлиги тартибсиз ўзгариб туриши кузатилган — у қирғоқ чизиғи томон оғиб кетган.
Соат 11:28 да экипаж билан алоқа узилган ва самолёт ерга қулаган. Оқтов аэропортининг қутқарув хизмати воқеа жойига биринчи бўлиб етиб келган ва дарҳол йўловчиларни эвакуация қилишга киришган.
Қозоғистондаги авиаҳалокат
Бокудан Грознийга J28243 рейсини амалга ошираётган Embraer 190 самолёти 25 декабрь куни эрталаб Қозоғистоннинг Оқтов шаҳри яқинида ҳалокатга учради. Диспетчерлар Грозний ва Махачқалъада қўнишни рад этганидан кейин лайнер мажбурий қўнишни амалга оширишга уринди. Оқтов аэропортига бир неча километр қолганда у қулаб тушди, портлаб, ёниб кетди.
Бурун қисми тўлиқ ёнган, дум қисмида эса омон қолганлар бўлган. Камида 29 нафар тирик қолган йўловчи айнан шу қисмда бўлган. Улар касалхонага олиб келинган. Azerbaijan Airlines самолёти қулаши оқибатида 38 киши ҳалок бўлган. Самолёт бортида жами 67 киши — 62 йўловчи ва беш экипаж аъзоси бўлган.
Қулаган самолёт кўздан кечирилганда тешиклар аниқланган. Шунга асосланиб, айрим манбалар самолётни Чеченистонга дрон ҳужумини қайтарган ҳаво ҳужумидан мудофаа тизими ўққа тутган бўлиши мумкинлигини ёзган.
Изоҳ (0)