Турк эстрада хонандаси Сердар Ўртач Ўзлем Эсра Ада бошловчилигидаги тонгги дастур меҳмони бўлди. Суҳбатда хонанда узоқ вақт давомида тарқоқ склероз касаллиги (марказий нерв системаси демиелинизацияси билан намоён бўлувчи сурункали аутоиммун касаллик) билан курашиб бораётгани, соғлиғи, шахсий ҳаёти ҳамда карьераси ҳақидаги саволларга жавоб берди.
“Уй қамоғида ўтирганимда чап қўлим ишламай қолди”
Сердар Ўртач аввалроқ аутоиммун касаллик туфайли чап оёғи ишламай қолгани ҳақида маълум қилган эди:
“Уй қамоғида бўлганимда касаллик туфайли чап қўлимни ҳам йўқотдим, юришим қийин эди, лекин шунга қарамай, мен саҳнага чиқиб, концерт ўтказишни ният қилган эдим. Ва бунинг уддасидан чиқдим ҳам. Аммо кейин мен азарт ўйинларига берилиб кетдим, сўнг уй қамоғига маҳкум бўлдим. Ўз уйимда кишанлар билан юрар эдим. Бундай стрессли вазиятга менинг организмим тоқат қила олмади ва сурункали касаллик авж олиб, бир қўлим ишламай қолди”.
“Мени бошқа ҳеч қачон телевидениеда кўрмайсиз”
Бўлиб ўтган воқеалардан кейин мухлислар томонидан билдирилган турли фикрлар туфайли таниқли қўшиқчи эндиликда умуман телевизорга чиқмаслигини эълон қилди:
“Энди мен бир оғиз сўз айтишга қўрқаман, бу эса давлат телеканалига берадиган менинг сўнгги жонли эфирим бўлади. Эндиликда мени телевизорда кўрмайсиз, албатта, кўчадаги папарацсилар билан суҳбатлар бундан мустасно”.
“Яна бир бор концерт берсам, одам эмасман”
Машҳур эстрада хонандаси фаолиятини якунлаш ҳақидаги қарорини эълон қилар экан:
“Қарзларим узилиши билан яна концерт берсам ёки яна қўшиқ айтсам, одам эмасман. Мен ҳаммасини ташлаб, қишлоғимга кетаман. Мен одамлардан жуда чарчадим. У ерда энди ўлимимни кутиб яшайман”, деди Ўртач.
“Энди яшашни хоҳламайман”
Ўртач сўзида давом этди:
“Кўп йиллардан буён саҳнада концерт бериб, одамларни хушнуд этиб келганман. Лекин ҳозир телевизорни ёқсам, узоқ йиллардан бери ака-ука деб юрган яқинларим мени ҳақорат қилиб ётибди. Бир вақтлар менинг концертларимга 350-400 минг киши келар эди, наҳот ҳамма менинг муваффақиятсизликка ботишимни кутиб турган бўлса?”, деди хонанда.
Маълумот учун, хонанда Сердар Ўртач букмекерлик хизматларидан фойдалангани ва ноқонуний қимор ўйинларини ўйнагани учун уч йилгача қамоқ жазосига ҳукм қилинган эди, сўнг ҳукм ўзгартирилиб, Ўртач уй қамоғига ўтказилди. Бироқ адвокатлар апелляцияга бергач, хонандага нисбатан чиқарилган қарор бекор қилинди.
Изоҳ (0)