Актриса Марям Узерли “Муҳташам юз йил”да суратга тушгандан сўнг у орзу қилган барча нарсага: машҳурлик, пул, режиссёрлар ва томошабинларнинг эътирофига эришди. У Хуррам образини шундай маҳорат билан ўйнадики, султон Сулаймон нима учун айнан шу аёлга мафтун бўлгани барчага аён бўлди. Аммо учинчи мавсумнинг сўнгги эпизодларида Узерли нафақат лойиҳадан, ҳатто Туркиядан ҳам қочиб кетишга мажбур бўлди.
Актрисалик сари
Бўлажак юлдуз 1983 йилда Германияда кўп фарзандли оилада туғилган. Унинг онаси немис, отаси турк бўлган, Марям тўрт фарзанднинг кенжаси эди. У болалигидан санъатга яқин бўлган. Кичкина Марям отасининг дўсти томонидан бошқариладиган театрда ҳақиқий саҳнага биринчи марта чиққан. Айнан ўша пайтда ёш қизалоқ келажакда ким бўлишини англаб етган.
Унинг ота-онаси қизидаги қобилиятни кўргач, Марямни мусиқа ва театр санъатига ихтисослаштирилган мактабга берди. Айнан мактабда у актёрлик маҳоратини ўрганишга биринчи қадамларини қўйди. Ўрта таълимни тугатгандан сўнг, у Гамбургдаги Фрезе драма олийгоҳига ўқишга кирди. У ерга 300 та абитуриентдан атиги беш нафари қабул қилинди ва Марям Узерли улар орасида эди.
У қунт билан ўқиди, иқтидорли талабалар сафига киритилди ва Гамбург театри труппасига таклиф қилинди. Актриса театрда олти йил давомида ишлади. Кейинроқ у Германия пойтахтига кўчиб кетди ва Берлиндаги саҳналарда чиқа бошлади. Ўша йилларда Узерли киноларда ҳам рол ўйнай бошлади.
Асосий рол
Кунларнинг бирида Марям Узерлининг Гамбург театридаги ҳамкасби унга турк кино ижодкорлари бошлаган йирик лойиҳа ҳақида сўзлаб берди. Тарихий сериал турк кино саноати тарихида шов-шувли воқеа бўлишига ваъда берган эди. Режиссёрлар аллақачон барча асосий роллар учун актёрларни топишган, аммо султоннинг суюклиси ролини ижро этиши мумкин бўлган актрисани танлашга қийналган эди. Марям эса таваккал қилишга қарор қилди ва тез орада кастинг учун Туркияга учиб кетди.
Ўша пайтда уни Берлинда ушлаб турадиган ҳеч нарса йўқ эди, чунки актрисанинг олти йил мобайнида давом этган муносабатлари узилганига кўп бўлмаганди. Қолаверса, Марямнинг молиявий аҳволи яхши эмас эди. Янги лойиҳа уни муваффақиятсиз муносабатлардан чалғиш ва яхши даромад топиш учун имконият берарди.
Ва ниҳоят, узоқ давом этган тингловлар ва беш кунлик кастингдан сўнг Марям ҳаётини ўзгартириб юборадиган сўзларни эшитди: “Сиз Туркияда бир неча йил қолишингизга тўғри келади, табриклаймиз!”.
Дастлаб, Узерли суратга олиш жараёнидан завқланди, қаҳрамони билан бирга турк тилини ўрганди, ажойиб либослар кийди ва Хуррам Султон ролида ўзини жуда эркин ҳис қилди. У сочларини қизил рангга бўяди ва экранда жуда нозик кўринмаслик учун продюсернинг илтимосига биноан бир неча килограмм вазн орттирди. Биринчи эпизодлар чиққандан кейин Марям Узерли жуда машҳур бўлди. Лойиҳа дунёнинг кўплаб мамлакатларида эфирга узатилгани сабабли актрисанинг шуҳрати фақат Туркия билан чегараланиб қолмади.
Аммо лойиҳа узоқ давом этди ва Хуррам образи қаҳрамони жуда чарчай бошлаганини тушунди. Суратга олиш ишлари бир кунда камида 16 соат давом этар, оддий овқатланиш ёки ухлаш учун ҳам вақт қолмас эди. “Муҳташам юз йил” нинг учинчи мавсуми охирига келиб, Марям сериалда иштирок этишга ўзида куч топа олмади. У нарсаларини йиғиб, Германияга учиб кетди. Продюсерлар ва режиссёрлар актрисанинг юлдузлик касалига чалинганини айтди, аммо Марям бунга ҳатто эътироз билдиришга ҳам куч топа олмади. Актрисанинг шахсий муаммолари анча чуқур илдиз отган эди.
Оилавий бахтдан мосуво Марям
Актриса машҳур бўла бошлагач, унинг атрофида ошиқларнинг сони ҳам орта бошлади, натижада Узерли улардан бирини ёқтириб қолди. Эртакдаги ҳақиқий шаҳзодалардек муомала қилган, қимматбаҳо совға-саломларга тўлдирган қаллиғи — тадбиркор Жан Атеш кўринганидек содиқ бўлиб чиқмади.
Марям Узерли ва журналистлар ўртасида ижодий кеча ва турли учрашувлар ташкил қилинса, Атеш ҳам доимо унинг ёнида пайдо бўлар, Марям номидан жавоблар берар, шахсий ҳаёти тафсилотларини уялмай ОАВ билан баҳам кўрар эди. Жан Атеш миллионлаб томошабинларга Марямнинг ортиқча вазни (сериал ижодкорларининг илтимосига кўра вазн орттирган), ташқи кўринишини танқид қиларди. Тадбиркор ўзининг бундай қилмиши актрисани жуда хафа қилишига парво ҳам қилмас эди.
Марям унга ҳомиладорлиги ҳақида хабар берганидан кейин вазият янада ёмонлашди. Жан меросхўрларга эга бўлишни истамаслигини айтиб, боладан воз кечишни талаб қилди, бунинг устига, тадбиркорнинг олдинги муносабатларидан фарзандлари бор эди ва Марямга уйланишни истамасди.
Ва ниҳоят, Атешнинг ҳақиқий қиёфаси очилди. Ўтган воқеалардан сўнг Марям ўз жонига қасд қилмоқчи бўлди, аммо Атеш уни тўхтатиб қолди.
Ўша вақтда “Муҳташам юз йил” нинг учинчи мавсуми суратга олинаётган эди, унга юкланган барча масъулиятга қарамай, Марям Туркиядан кетишга қарор қилди ва Жан Атеш билан бутунлай алоқани узди. Актрисанинг мухлислари унинг аҳволидан жиддий хавотирда эди, продюсерлар эса лойиҳанинг рейтинги тушиб кетгани учун Марямдан нафратлана бошлади.
Янги Марям ва ўтмишдан пушаймонлик
2014 йил қишда актриса қиз фарзандли бўлди. У қизининг отасига Лара билан мулоқот қилишни тақиқламади, лекин уларнинг учрашувлари фақат онаси иштирокида бўлиб ўтишини талаб қилди. У ташқи кўриниши ҳақидаги комплексларидан халос бўлди, пластик жарроҳлик амалиётини ўтказди ва ўз касбига қайтди. Кейинчалик унинг ҳаётида бошқа эркаклар пайдо бўла бошлади. Бу сафар у шахсий ҳаётини оммага кўрсатмасликни афзал билди.
2021 йил бошида актриса Лили Кои исмли қизини дунёга келтирди. У кенжа фарзандининг отаси ким эканини яширди. Фақат у америкалик бизнесменлиги аён эди. Бироқ Марям Узерли у билан ҳам ажрашди.
Бугунги кунда актриса фильмларда фаол рол ўйнайди, қизлари тарбияси билан шуғулланади ва янги лойиҳаларда иштирок этишдан аввал шартнома шартларини диққат билан ўрганиб чиқади.
Изоҳ (0)