Дамашқда ҳокимиятни қўлга киритган қуролли суриялик мухолифат Туркияни олти ой олдин кенг кўламли ҳужум бошлаш нияти ҳақида огоҳлантирган. Бу ҳақда тегишли манбаларга таяниб, Reuters хабар берди.
Манбаларнинг аниқлик киритишича, исёнчилар Суриядаги фуқаролар уруши бошланганидан бери Сурия мухолифатининг асосий ҳомийлари бўлиб келган турк расмийларини огоҳлантирмасдан ҳаракат қила олмайди. Шу билан бирга, исёнчилар асосий мақсади — Суриянинг иккинчи йирик шаҳри бўлмиш Ҳалабни қўлга киритиш операцияси учун Анқарадан сўзсиз розилик олган.
Жасоратли режа “Ҳаят Таҳрир аш-Шам” (ҲЦҲ) гуруҳи ва унинг раҳбари Абу Муҳаммад ал-Жулоний томонидан ишлаб чиқилган, дейди нашр суҳбатдошларидан бири.
Бунгача 2020 йилда Россия билан Сурия шимоли-ғарбидаги жанговар ҳаракатларни юмшатиш бўйича келишувга эришган Туркия, минтақада қочқинларнинг янги тўлқини пайдо бўлишига олиб келишидан қўрқиб, исёнчиларнинг йирик ҳужумига қарши чиққан эди. Бироқ Reuters манбаларига кўра, йил бошида Сурия мухолифати Анқара президент Башар Асадга нисбатан ўз позициясини кескинлаштирганини сезган.
Бу Туркия президенти Ражаб Тоййиб Эрдўғоннинг Сурия олдида турган ҳарбий бошоққа сиёсий ечим топишга уринишларини рад этганидан кейин содир бўлди. Қуролли мухолифат бундан унумли фойдаланиб, турк расмийларига Асадни ағдариш режасини тақдим этган.
Улар дипломатия йўли “йиллар давомида ишламаётгани”, шунинг учун бошқа ёндашувни синаб кўриш кераклигини таъкидлаган.
Исёнчилар Туркияга “Сиз ҳеч нарса қилишингиз шарт эмас, шунчаки аралашманг” дея хабар йўллаган, дейди Reuters нашри.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этгани ҳақида хабарлар тарқалди.
Кейинроқ Reuters нашри Асад бортида бўлган самолёт радарлардан йўқолгани, эҳтимол, уриб туширилган бўлиши мумкинлигини маълум қилди.
Россия Ташқи ишлар вазирлиги эса Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилинган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Изоҳ (0)