«Истиқлол» санъат саройида 25-26 сентябрь кунлари турк эстрада юлдузи Сердар Ўртачнинг концерт дастури бўлиб ўтди. Дастурда меҳмон бўлган журналист Феруз Муҳаммад концерт ҳақидаги фикр мулоҳазаларини ўртоқлашди.
Муҳташам декорация, саҳнани бутунлай эгаллаган катта монитор бу дастурга алоҳида, катта тайёргарлик кўрилганидан далолат беради.
Афзал Рафиқовнинг монологи билан бошланган дастурни Абдурашид Йўлдошев ўзининг ватан ҳақидаги таронаси билан давом эттирди.
Навбати билан Сардор Мамадалиев, Озодбек Назарбеков, Мавлуда Асалхўжаевалар чиқиш қилишди. Бу дастурда Ўзбекистонда хизмат кўрсатган Обид Асомов «Истиқлол» санъат саройидаги узоқ танаффусдан сўнг чиқиш қилиб, мухлисларни кулдиришга ҳаракат қилди.
Дастурнинг асосий эгаси Сердар Ўртачни мухлислар давомли қарсаклар билан кутиб олди. Унинг деярли барча қўшиқларига жўр бўлишди.
Сердар Ўртач концертда ўзини ниҳоятда эркин тутадиган, мухлислар билан бирга куйлайдиган хоҳласа, қўшиқнинг ўртасида куйлашдан тўхтаб, мухлисларга мурожаат қиладиган шоумен экан.
Дастур ўртасида бир ошиқ йигит саҳнада севган қизини қўлини сўраб «сен мен билан ҳаётим охиригача бирга бўласанми», дея сўради ва севгилисидан «ҳа» деган жавоб олди. Барча мухлислар гулдурос қарсаклар билан севишганларни олқишлашди.
Сердар Ўртач Ўзбекистон халқ артисти Юлдуз Усмоновани жуда ҳам ҳурмат қилар экан. Даставвал иккала хонанда биргаликда «Диемем» номли таронасини куйлаб беришди. Ундан сўнг Сердар Ўртач Юлдуз Усмоновадан «Санамгина» таронасини куйлаб беришини илтимос қилди. Юлдуз Усмонова мазкур қўшиқни куйлагандан сўнг «Сердар Туркияда ҳам «Санамгина»ни куйлаб бер дея ҳоли-жонимга қўймас эди», дея қўшимча қилди. Юлдуз Усмонова «Санамгина»ни мусиқасиз ҳам яхши куйлади.
Дастур сўнггида Мавлуда Асалхўжаева, Сардор Мамадалиев, Гуласал Абдуллаева ҳамда Сердар Ўртач биргаликда «Қўшиқ» деб номланган таронани куйлашди.
Изоҳ (0)