БМТ Бош ассамблеяси Исроилни Голан тепаликларини тарк этишга ва 1967 йилги чегараларига қайтишга чақирувчи резолюцияни қабул қилди. Ўзбекистон унинг қабул қилиниши учун овоз берди.
БМТ Бош ассамблеясининг 78-сессиясида Исроилни 1967 йилдаги чегараларига қайтишга чақирувчи резолюция овозга қўйилди.
Резолюцияни 91 та давлат қўллаб-қувватлади, саккизтаси қарши чиқди, 62 давлат бетараф қолди. Ҳужжат учун Ўзбекистон, Қозоғистон, Россия, Бразилия, Ҳиндистон, Хитой, Саудия Арабистони ва бошқалар овоз берди. АҚШ, Буюк Британия, Австралия, Канада, Исроил ва бошқалар эса қарши чиқди.
Фаластиннинг БМТдаги доимий кузатувчиси Риёд Мансуранинг айтишича, бу фаластинликлар Ғазо секторида бошдан кечирган энг ҳалокатли даврдир.
“Улар аввалги кўплаб ҳужумларга гувоҳ бўлди. Камида 15 минг фаластинлик ҳалок бўлди, 30 мингдан зиёди яраланди. Бу Фаластин ва унинг халқига қарши кенг кўламли уруш. Ғазода 1,8 миллиондан ортиқ тинч аҳоли ёки аҳолининг қарийб 80 фоизи ўз уйларини ташлаб кетишга мажбур бўлгани тахмин қилинмоқда, Ғазодаги қарийб 1,1 миллион киши БМТнинг Яқин Шарқдаги Фаластинлик қочқинларга ёрдам агентлиги ва ташкилот томонидан бошқариладиган муассасаларда бошпана топмоқда, улар БМТ байроғи остида ҳам ҳимояланмаган”, — деди у Бош ассамблея сессиясида.
Голан тепаликлари Яқин Шарқдаги ҳудуддир. Ҳозирда унинг катта қисми Исроил, шарқий қисми эса Сурия назоратида. Голан тепаликлари тўғрисидаги қонун 1981 йил 14 декабрда Кнессет (Исроилнинг бир палатали қонун чиқарувчи органи) томонидан ратификация қилинган. У халқаро миқёсда қораланган ва БМТ Хавфсизлик кенгашининг 1981 йил 17 декабрдаги 497-сонли резолюциясига биноан ўз кучини йўқотган.
Изоҳ (0)