Isroil armiyasi yarim asrdan ko‘proq vaqt ichida birinchi marta Suriya hududiga Golan tepaliklari chegarasidan kirdi. Bu haqda ikki nafar isroillik amaldorga tayanib The New York Times (NYT) xabar berdi.
“Dam olish kuni Isroilning quruqlikdagi qo‘shinlari demilitarizatsiya zonasidan chiqdi, bu ularning 1973-yilgi Oktyabr urushidan beri Suriya hududiga birinchi ochiq bostirib kirishi bo‘ldi”, deyiladi xabarda.
Rasmiylarning so‘zlariga ko‘ra, Tel Aviv Suriya qurolli muxolifati a’zolari Golan tepaliklari yaqinidagi harbiy obyektlarni nazoratga olib, ulardan Isroilga qarshi foydalanishi mumkinligidan xavotirda.
Isroil armiyasi vakili avvalroq Suriya janubidagi beshta chegaradosh aholi punkti aholisini xavfsizlik maqsadida uylarida qolishga va ko‘chaga chiqmaslikka chaqirgan edi. Isroilning Kan davlat teleradiokompaniyasiga ko‘ra, mamlakat armiyasi 8-dekabr kuni Suriya armiyasi bufer hududdagi o‘z pozitsiyalarini tark etganidan so‘ng Xermon tog‘idagi Suriya postini egallagan.
Isroil bosh vaziri Binyamin Netanyaxu Suriya harbiylari o‘z pozitsiyalarini tark etgani sababli 1973-yilgi “Qiyomat kuni”dan ko‘p o‘tmay Golan tepaliklarida Damashq bilan kuchlarni ajratish to‘g‘risidagi kelishuv o‘z kuchini yo‘qotganini aytgan edi. Shu munosabat bilan Isroil armiyasiga chegara hududini va uni nazorat qiluvchi pozitsiyalarni egallash haqida buyruq bergan.
Isroil Suriya prezidenti Bashar Asad hokimiyatining qulashi va mamlakatning katta qismini qurolli muxolifat kuchlari bosib olishi fonida Golan tepaligidagi mudofaasini faol ravishda mustahkamlamoqda.
8-dekabr kuni Suriyadagi qurolli muxolifat vakillari mamlakat ustidan nazorat o‘rnatganini e’lon qildi. Suriya bosh vaziri Muhammad G‘ozi al-Jaliliy mamlakatda bir nechta vazir bilan qolishini aytdi, u muxolifat rahbariyati bilan aloqa o‘rnatdi.
Rossiya TIV xabariga ko‘ra, Suriya prezidenti Bashar Asad bir qator mojaro ishtirokchilari bilan muzokaralardan so‘ng lavozimini tark etishga qaror qilgan va hokimiyatni tinch yo‘l bilan topshirish bo‘yicha ko‘rsatma berib, mamlakatni tark etgan.
Keyinroq Kremldagi manba Asad o‘z oila a’zolari bilan Moskvaga kelgani, Rossiya ularga insonparvarlik nuqtayi nazaridan boshpana bergani haqida xabar bergan. Shuningdek, Moskva Suriya hududida Rossiyaning harbiy bazalari va diplomatik muassasalari xavfsizligini kafolatlagan Suriya qurolli muxolifati vakillari bilan aloqada bo‘lib turishini aytgan.
Golan tepaliklari 1967-yilgacha Suriyaga tegishli bo‘lgan. Olti kunlik urush davomida Isroil qo‘shinlari bu hududni egallab olgan, 1973-yilgi “Qiyomat kuni” urushi yakunlari bo‘yicha tomonlar yarashish va qo‘shinlarni ajratish to‘g‘risida bitim tuzgan. 1974-yilda mintaqada BMT tinchlikparvar postlari paydo bo‘lgan. Chegara chizig‘i Suriya tomonidan “Bravo”, Isroil tomonidan esa “Alfa” deb nomlangan.
Izoh (0)