Американинг Netflix платформаси ўзининг расмий YouTube каналида “Калмар ўйини” сериали иккинчи фаслининг трейлерини жойлади.
Иккинчи мавсумда сериалнинг биринчи қисмидаги ўйинда ғолиб бўлган бош қаҳрамон — 456-рақамли иштирокчи Сон Ки Хун иштирок этади. У бешафқат ўйинлар ташкилотчисидан ўч олиш ҳамда ҳалокатларга олиб келувчи даҳшатли воқеаларни тўхтатиш мақсадида Калмар ўйинига қайтади.
“Мен бу ўйинга чек қўймоқчиман”, дейди қаҳрамон видеода.
Фильмдаги воқеалар биринчи қисм тугаганидан уч йил ўтгач содир бўлади. Унда ўйин ташкилотчисининг қандай қилиб бу ишларга аралашиб қолгани ҳақида ҳам сўз юритилади.
“Албатта, сериалдаги ушбу ҳикоя томошабинларнинг унга ҳамдард бўлишига олиб келмайди, аммо сериал мазмунини ва ташкилотчи нега бундай танлов қилганини яхшироқ тушунишга ёрдам беради”,
деди актёр Ли Бен Хон.
Жанубий Корея сериалининг иккинчи фасли премьераси жорий йилнинг 26 декабрига белгиланган.
“Калмар ўйини” нинг учинчи мавсуми 2025 йилда премьера қилиниши кутилмоқда, бу мавсум сериал учун охиргиси бўлади.
“Калмар ўйини”да катта пул мукофоти ваъда қилинган ўйинда омон қолиш учун шафқатсиз синовларда қатнашишга мажбур бўлган ва қарзга ботган бир гуруҳ одамлар ҳақида ҳикоя қилади. Сериал иштирокчиларни болалар ўйини асосида тузилган бир нечта ҳалокатли ўйинларда иштирок этади. Ҳар бир мағлубият ўлимни англатади.
Сериал режиссёри ва сценарий муаллифи Хванг Дон Хек лойиҳа ғоясини 10 йилдан ортиқ вақт давомида ишлаб чиққан, бироқ Netflix кўмагидагина уни экранда жонлантиришга муваффақ бўлган. 2021 йил сентябрда чиққан мазкур сериал бутун дунё бўйлаб миллионлаб томошаларни йиғди ва платформанинг энг муваффақиятли лойиҳаларидан бирига айланди.
Изоҳ (0)