Келгусида ўзбекистонликлар Жанубий Кореяга E-8 визаси бўйича ҳам ишга юборилади, деб хабар бермоқда Ташқи меҳнат миграцияси агентлиги ахборот хизмати.
Унга кўра, камбағалликни қисқартириш ва бандлик вазири Беҳзод Мусаев Корея Адлия вазирлигининг иммиграция департаменти раҳбари Ким Жонг До бошчилигидаги делегация аъзолари билан учрашди. Мулоқотда Кореяда вақтинча ишлаш истагида бўлган юртдошларни ушбу давлатга нафақат E-9 (нопрофессионал), балки Э-8 (мавсумий) ҳамда Э-7 (профессионал) визалари асосида юбориш масалалари муҳокама қилинди.
Шунингдек, икки давлат ўртасидаги миграция жараёнларини қонуний ва хавфсиз амалга ошириш, ўзбекистонликларнинг Кореяда ноқонуний меҳнат фаолиятини олиб бориш ҳолатларига буткул барҳам бериш юзасидан келишиб олинди.
Аввалроқ Сурхондарё вилояти ҳокими Улуғбек Қосимов Корея халқаро ҳамкорлик агентлиги (KOICA) лойиҳа менежери Ким Чон Бин ва лойиҳа ижрочиси, сотиб олувчи “БЖ Агро” корхонаси ижрочи директорини қабул қилганди. Учрашувда Сурхондарё вилояти Олтинсой тумани ва Кореянинг Дамянг тумани ўртасида қишлоқ хўжалиги маҳсулотлари етиштириш борасида ҳамкорлик, хусусан, туманда 6 млн долларлик лойиҳани амалга оширишга инвестиция киритиш, лойиҳа доирасида 250 нафар ёшни Кореяга мавсумий ишга юбориш, брокколи карами етиштиришни йўлга қўйиш, 100 нафар олтинсойлик фермерларни Кореяда ўқитиш масалалари муҳокама қилинган.
Изоҳ (0)