Москва вилоятининг Шчелково шаҳрида ўзбекистонлик маст муҳожир кар-соқов бўлган 49 ёшли эркак билан юз берган можаро оқибатида уни шафқатсизларча калтаклаб ўлдирди. Ҳодиса 20 июль куни содир бўлган, деб хабар берди Москва вилояти прокуратураси.
Тергов маълумотларига кўра, эркак чиқинди контейнерлари ёнидан ўтиб кетаётганда, маҳаллий бошқарув компаниясида ёрдамчи ишчи бўлиб ишлаётган икки нафар Ўзбекистон фуқароси ахлат титкилаётган бўлган. Шунда кар-соқов имо-ишоралар билан норозилик билдира бошлаган. Бироқ муҳожирларнинг айтишича, улар унинг имо-ишораларини тажовуз деб тушунишган.
Маст ҳолатда бўлган ишчилардан бири эркакнинг қорнига икки марта, бошига бир марта зарба берган. Эркак бирор марта ҳам қаршилик кўрсатмаган. Жабрланувчи йиқилиб, ерга қаттиқ урилган. Шундан сўнг улар жиноят изларини яширишга уринишган ва жасадни буталар орасига судраб, қочиб кетишган.
RBC нашрининг хабар қилишича, терговчилар кузатув камералари ёзувлари орқали гумонланувчининг шахсини аниқлашга ва воқеанинг тўлиқ манзарасини тиклашга эришган.
Маълум бўлишича, айбланувчи 26 ёшли Ўзбекистон фуқароси бўлиб, Россия ҳудудида ноқонуний равишда яшаган. Ҳозирда у қамоққа олинган, унга “эҳтиётсизлик орқасида одам ўлимига сабаб бўлган қасддан баданга оғир шикаст етказиш” моддаси бўйича айблов эълон қилинган.
Изоҳ (0)