Жанубий Корея Украинага 100 миллион доллар миқдоридаги ёрдамнинг биринчи траншини тақдим этди.
Бу ҳақда Украина бош вазири Денис Шмигал ижтимоий тармоқларда маълум қилган.
“Жанубий Кореядан 100 миллион доллар олинди, бу кореялик ҳамкорлар томонидан ижтимоий соҳани қўллаб-қувватлашга қаратилган биринчи бюджет ёрдамидир”, деди у.
Шмигалнинг айтишича, Украинага 2,1 миллиард долларгача жалб қилиш имконини берувчи келишув ҳам имзоланган.
Аввалроқ Денис Шмигал Украина Peace лойиҳаси доирасида Жаҳон банкидан яна 4,8 миллиард доллар олишини айтиб ўтганди.
“Биз ушбу ёрдамни молиялаштириб, мамлакатимиз ва халқимизга зарурий ёрдам кўрсатаётган Қўшма Штатлар ва ривожланиш бўйича ҳамкорлардан жуда миннатдормиз”, дея таъкидлаган у.
Украина 2025 йил учун давлат бюджетидан мудофаа ва хавфсизлик секторларига рекорд даражадаги 54,2 миллиард доллар (2,23 триллион гривна) ажратган.
Шундан 17,96 миллиард доллари (739 миллиард гривна) қурол-яроғ ишлаб чиқариш, харид қилиш ва дронлар учун мўлжалланган.
Давлат бюджетининг энг катта қисми ҳарбий ҳаракатларни давом эттиришга ажратилади. Шу билан бирга, ижтимоий соҳалар ҳам устувор йўналишлар сифатида белгиланган. Жумладан:
- Ижтимоий дастурлар учун 10,24 миллиард доллар (421 миллиард гривна) ажратилиб, март ойида нафақалар индексацияси амалга оширилади.
- Таълим учун 4,84 миллиард доллар (199 миллиард гривна) ва соғлиқни сақлаш учун 5,27 миллиард доллар (217 миллиард гривна) ажратилган. Ушбу маблағлар таълим ва тиббиёт муассасаларини модернизация қилишга йўналтирилади.
- Хусусан, шифохоналарни янгилаш ва реабилитация марказлари ташкил этиш учун 260,1 миллион доллар (10,7 миллиард гривна), таълим муассасаларини модернизация қилиш ва бошпаналар қуриш учун эса 425,4 миллион доллар (17,5 миллиард гривна) йўналтириш кўзда тутилган.
Изоҳ (0)