Американинг нуфузли ESPN нашри профессионал бокснинг барча вазн тоифалари бўйича навбатдаги “pound-fot-pound” (P4P) рейтингини эълон қилди. Мазкур рўйхат боксчиларнинг рингдаги натижалари, чемпионлик камарлари, рақиблар даражаси ва спортчиларнинг умумий устунлиги асосида тузилган.
Рейтингнинг юқори поғонасида украиналик Олександр Усик жойлашган. 38 ёшли боксчи 20 июль куни Лондоннинг “Уэмбли” стадионида британиялик Даниэль Дюбоани нокаутга учратди ва шу орқали оғир вазн тоифасида иккинчи бор мутлақ жаҳон чемпионига айланди. Ушбу ғалаба билан Усик P4P рейтингидаги етакчилигини мустаҳкамлаб олди.
Рейтингнинг иккинчи поғонасидан япониялик Наоя Иноуэ жой олди. Супер енгил вазн тоифасининг мутлақ чемпион ушбу вазнда WBA, WBC, IBF ва WBO камарларини бирлаштириб, мағлубият нималигини билмай келмоқда (30-0, 27 КО). Иноуэ навбатдаги жангини 2025 йилнинг 14 сентябрь куни ўзбекистонлик боксчи Муроджон Аҳмадалиевга қарши ўтказади.
Кучли учликка америкалик Теренс Кроуфорд якун ясаган. Икки вазн тоифасида тўрт марта жаҳон чемпиони бўлган Теренс ўзининг енгилмас боксчи эканлигини исботлаб келмоқда. У 2025 йилнинг 13 сентябрь куни Сауль “Канело” Алваресга қарши супер ўрта вазн тоифасидаги навбатдаги жангини ўтказади. Ушбу беллашувдаги ғалаба Кроуфорд учун навбатдаги чемпионликни тақдим этиши мумкин.
Рейтингдаги энг муҳим ўзгаришлардан бири — россиялик Артур Бетербиев кучли бешликни тарк этди. Унинг ўрнини эса америкалик боксчи Жесси Родригес эгаллади. Родригес 19 июль куни ўтказилган жангда жанубий африкалик Пхумеле Кафунини 10-раундда мағлубиятга учратиб, WBC ва WBO камарларини бирлаштирди. Бу ютуқ уни рейтингда юқорилашига сабаб бўлди.
ESPN талқинига кўра, дунёнинг энг яхши 10 нафар боксчиси (вазн тоифасидан қатъи назар):
- Олександр Усик (Украина)
- Наоя Иноуэ (Япония)
- Теренс Кроуфорд (АҚШ)
- Дмитрий Бивол (Россия)
- Жесси Родригес (АҚШ)
- Артур Бетербиев (Россия)
- Шакур Стивенсон (АҚШ)
- Сауль Алварес (Мексика)
- Девид Бенавидес (АҚШ)
- Дзунто Накатани (Япония)
Изоҳ (0)