“Ювентус” “Челси”нинг Кенан Йилдиз бўйича таклифини рад этди

“Ювентус” клуби 20 ёшли туркиялик футболчи Кенан Йилдизни “Челси”га сотишни истамади. Бу ҳақда Италиянинг La Gazzetta dello Sport нашри хабар берди.

Лондон клуби Йилдиз учун 68 миллион еврогача тўлашга тайёр эди, бироқ “кекса синёра” футболчини қўйиб юборишни истамаётганини очиқ билдирган. Турин клуби Йилдизни жамоанинг келажакдаги асосий футболчиларидан бири сифатида кўраётгани ва ҳаттоки ундан юқори таклифлар эвазига ҳам Кенанни қўйиб юбормаслигини таъкидлаган.

Хабарларга кўра, “Ювентус” яқин кунларда Кенан Йилдизга янги шартнома таклиф қилади. Унга кўра, туркиялик иқтидорнинг йиллик маоши 1,5 миллион евродан 4 миллион еврога оширилади. Шунингдек, у билан тузиладиган янги битим ҳам узоқ муддатли бўлади.

Маълумот учун, Кенан Йилдиз ўтган мавсум клуб таркибида жамо 52 та ўйин ўтказиб, ўз ҳисобига 12 та гол ва 9 та голли узатма ёздириб қўйган. Transfermarkt портали вингернинг қийматини 50 миллион еврога баҳоламоқда. Футболчининг туринликлар билан шартномаси 2029 йилга қадар амал қилади.