Мамлакатнинг умумий ер майдони 44,9 миллион гектарни ташкил этади. Бу ҳақда Кадастр агентлиги хабар берди.
Ўзбекистон ерларининг энг катта қисми қишлоқ хўжалиги учун ажратилган. Яъни 26,2 миллион гектар майдонлардан мазкур соҳа вакиллари фойдаланади.
Республика ер фонди таркибида 11 миллион гектар ерлар ўрмонларга тегишли. Табиатни муҳофаза қилишга мўлжалланган ерлар улуши ҳам нисбатан юқори — 4,2 миллион гектар.
Мамлакат ерларининг 1,3 миллион гектари захира, 1 миллион гектари сув фондига қарашли. Шу билан бирга, саноат, транспорт, алоқа ва мудофаа ерлари 798,8 минг гектар, аҳоли пунктлари ерлари 221,5 минг гектарни ташкил этади. Тарихий-маданий аҳамиятга эга ерлар майдони эса 32,3 минг гектарга тенг.
Кадастр агентлиги таҳлилига кўра, республика ерларининг 95 фоизи (42,5 миллион гектар) “UZKAD” ахборот тизимида электрон харитага туширилган.
“Шу асосда 42,1 миллион гектар ер учун 1,9 миллионта ердан фойдаланувчилар кесимида кадастр йиғма жилдлари шакллантирилиб, давлат рўйхатидан ўтказилди”, дейилади манба хабарида.
Ҳуқуқий ҳужжатлари тўлиқ бўлмаган 200 минг гектар ер майдонида фаолият юритаётган 366,5 мингта субъект фойдаланувчи сифатида ҳисобга олинган.
Бундан ташқари, 181,7 мингта илгари ҳисобга олинмаган объект, 2,3 мингта қўшимча қурилма аниқланиб, 155,8 миллиард сўм миқдоридаги солиқлар давлат бюджетига ҳисобланган.
Изоҳ (0)