Буюк Британияда дунёдаги энг кекса эркак вафот этди. Жон Тиннисвуд 112 ёшда бўлган. Бу ҳақда Sky News хабар берди.
Тиннисвуд 1912 йил 26 августда машҳур “Титаник” лайнери чўкиб кетган йили Ливерпулда туғилган. У 2024 йил апрель ойида венесуэлалик 114 ёшли Хуан Висенте Переснинг ўлимидан сўнг сайёрадаги энг кекса эркакка айланганди. Жон Тиннисвуд 25 ноябрь куни Саутпортдаги қариялар уйида вафот этган.
Унинг сўнгги куни мусиқа садолари остида ва муҳаббат қуршовида ўтди, дейди марҳумнинг қариндошлари.
Оила узоқ йиллар давомида унга ғамхўрлик қилган барча кишиларга, жумладан Hollies қариялар уйи ходимлари, шифокорлар, ҳамширалар, физиотерапевтларга миннатдорлик билдирди.
Тиннисвуд иккала жаҳон урушини ҳам бошдан кечирган. Иккинчи жаҳон уруши даврида у армиянинг молия корпусида административ лавозимда хизмат қилган. Унинг вазифалари ҳисоб-китоб юритиш, аудит ўтказиш, озиқ-овқат таъминотини ташкил этиш ва аскарларни эвакуация қилишда кўмаклашишни ўз ичига олган.
Урушдан сўнг у 1972 йилда нафақага чиққунга қадар Shell ва BP компанияларида бухгалтерлик фаолиятини давом эттирди.
Жон рафиқаси Блодвенни Ливерпулдаги рақс кечасида учратган. Эр-хотин 1986 йилда рафиқаси вафот этгунга қадар 44 йил бирга яшашган. Уларнинг Сюзан исмли қизи, тўрт набираси ва уч чевараси бор.
У ажойиб фазилатларга эга инсон эди: ақлли, қатъиятли, ҳар қандай вазиятда хотиржам, ажойиб математик қобилиятлар ва суҳбат олиб бориш истеъдодига эга бўлган, деди Тиннисвуднинг яқинлари.
Изоҳ (0)