Бел оғриғи одам дуч келадиган барча турдаги оғриқ синдромларининг энг кенг тарқалганидир. Баъзи маълумотларга кўра, эркак ва аёлларнинг 80 фоизи умуртқа поғонасининг турли қисмлари ёки мушак оғриғи билан касалланади. Кўп ҳолларда бел касалликларнинг ривожланишидан қочиш ёки ҳеч бўлмаганда уларнинг ривожланишини сезиларли даражада секинлаштириш мумкин. Бунинг учун «Новий очаг» нашри санаб ўтган одатлардан воз кечиш тавсия этилади.
Ҳаддан ташқари юмшоқ ўринда ухлаш
Тўғри ётоқ танлаш соғлиқ учун жуда муҳимдир. У жуда қаттиқ бўлмаслиги керак, айниқса кекса ёки ортиқча вазнли одамлар учун танланган бўлса. Аммо у жуда юмшоқ ҳам бўлмаслиги лозим, акс ҳолда умуртқа поғонаси етарли даражада қўллаб-қувватланмайди. 2003 йилда The Lancet журналида чоп этилган тадқиқот шуни кўрсатдики, юмшоқ тўшакда ухлаш умуртқа поғонаси касалликларини ривожланиш хавфини икки баравар оширади.
Телефонда кўп гаплашиш
Энг ёмон ҳолат телефонда гаплашиш, яъни мобил телефонни елка ва қулоқ ўртасида ушлаб туришдир. Аммо қўллардан фойдалансангиз ҳам суҳбат давомида бошни эгиб, бир елкани кўтариб, гавдани қийин ҳолатда қолдириш мумкин. Натижада бўйин ва умуртқа поғонасида мушакларнинг зўриқиши пайдо бўлади ва буларнинг барчаси умуртқа поғонаси соғлиғининг бузилишига олиб келиши мумкин. Агар мобил телефонда тез-тез ва узоқ вақт гаплашсангиз, эшитиш воситасидан фойдаланинг ёки мессенжерлардан фойдаланинг.
Уй ишларини бажариш
Кир ювиш, идиш-товоқ тозалаш, дазмоллаш, чанг артиш — бу кундалик юмушларнинг барчаси бел учун ҳақиқатан ҳам душмандир. Улардан узоқлашишнинг иложи йўқ, лекин белга озгина ёрдам бериш мумкин. Агар тик турган ҳолда бирон бир иш билан машғул бўлсангиз, биринчидан, елкани, иккинчидан, умуртқа поғонасини тўғрилаш ва тана вазнини бир оёққа ўтказмаслик, учинчидан, тиззаларни эгмаслик керак. Шундагина камроқ чарчаш мумкин, чунки юк умуртқа поғонаси бўйлаб тенг тақсимланади ва бел соҳаси деярли азобланмайди.
Баланд пошнали туфли кийиш
Деярли ҳамма баланд пошнали пойабзалларнинг зарари ҳақида билади ва уларни кийишда давом этмоқда. Баланд пошна гавданинг табиий шаклини бузади, мушак ва бўғимларга қўшимча стресс яратади, белни ортиқча зўриқтиради. Бундай вақтда баланд пошнали туфлилардан воз кечиш ва қулай тагликли пойабзалга ўтиш керак. Шунингдек, орқа қисми очиқ пойабзаллар ҳам зарарли бўлиб, уларда ҳаракатланиш умуртқа поғонасига салбий таъсир ўтказади. Бу эса ўз-ўзидан бел соҳасида оғриқларга сабаб бўлади.
Нотўғри овқатланиш
Ажабланарлиси шундаки, овқатланиш ҳам тўғридан-тўғри бел саломатлиги билан боғлиқ. 2014 йилда Asian Spine Journal журналида чоп этилган тадқиқот шуни кўрсатдики, бел оғриғидан шикоят қиладиган ҳар учинчи аёл ва ҳар тўртинчи эркак ошқозон-ичак тракти билан ҳам муаммоларга дуч келган. Енгил углеводлар ва шакарга бой рацион, сабзавот ва дуккакли экинларнинг етишмаслиги организмда — бел соҳасида яллиғланиш жараёнларининг ривожланишига сабаб бўлади.
Чекиш
Кашандалар диққатига: доимий чекиш орқа мия дискларини қон билан таъминланишини бузади, бу эса уларнинг эрта қариши ва йўқ қилинишига олиб келади. Чекилган ҳар бир сигарет том маънода умуртқа поғонасига таъсир ўтказади ва бел соҳасида муаммолар пайдо бўлишига олиб келади.
Изоҳ (0)