Уч фарзандини ёлғиз ўзи тарбиялаган, 50 ёшдан кейингина моделликда машҳур бўлган фантастик аёл — Мей Маск ҳақида

Мей Маскни фантастик аёл деб аташ мумкин. У собиқ эрининг хўрликлари остида синмади: ёлғиз ўзи 3 нафар фарзандини катта қилди, 5 та жойда ишлади. Бугун 74 ёшли аёл ажойиб фотосессиялари ва подиумлардаги дадил чиқишлари билан миллионлаб одамларни хайрон қолдирмоқда.

Мей Холдеман Канадада туғилади, аммо 3 ёшида оиласи Жанубий Африкага кўчиб кетади. Ҳар йилнинг июлида бутун оила Калахари чўли бўйлаб йўқолган шаҳарни излаб саёҳатга отланарди. Улар шаҳарни ҳеч қачон топа олишмайди, лекин Мейнинг сўзларига кўра, улар мисли кўрилмаган гўзал дарё ва ғорларни кўришга муваффақ бўлишади. Балки, айнан шу саёҳат Мейнинг кейинги саргузаштларга бой ҳаётига таъсир қилгандир.

Мей ўзининг моделлик фаолиятини 15 ёшида бошлаган, 6 йилдан сўнг у «Мисс Жанубий Африка» гўзаллик танловида ғолиб бўлган. 21 ёшида парҳезшунослик бўйича бакалавр даражасини олади. Ўша пайтларда у мижозлари билан ишлар, шу билан бирга мода журналига суратга тушишга ҳам улгурарди. 22 ёшида у ўқувчилик пайтида танишган жанубий африкалик муҳандис Эррол Маскка турмушга чиқади.

Бироқ оила қургач кўплаб қийинчиликларни бошдан кечиради, жумладан, эри ундан оиласи билан алоқаларини узишни талаб қилади, шунингдек, уни доимо «аҳмоқ, хунук ва зерикарли» деб атайди. Шунча гаплардан кейин ҳам у узоқ вақт давомида эри билан ажрашишга журъат эта олмайди, бундан ташқари ўша пайтдаги Жанубий Африка қонунлари ҳам бундай сабаблар билан никоҳни бекор қилмасди. 1979 йилда, қонун ўзгарганда, Мей ниҳоят эри билан ажрашади ва қўлида 3 боласи билан ёлғиз қолади.

Оила Канадага кўчиб келади. Мей ўқишни тўхтатмай, рўзғорини зўрға учма-уч эпларди. Интервьюларининг бирида у ўша пайтдаги қашшоқлик уни имкпн қадар кўпроқ ишлашга мажбур қилганини айтади, бир воқеани эса шундай эслайди: «Бир куни болаларимдан бири сутни тўкиб юборганида йиғлаганимни эслайман. Тўкилган сутга йиғлаш керак эмас, дейишади. Аммо мен йиғладим, чунки ўша куни бошқа сут сотиб олишга пулим йўқ эди». Мей биринчи маошига гилам сотиб олади, чунки улар кўчиб ўтган уйда ўтириш учун стуллар ҳам йўқ эди. Бироз вақт ўтгач, Илон учун компьютер олинади, у ўтиришга бошқа жой йўқлигидан айнан шу гилам устида компьютер билан шуғулланади.

Мей ҳар доим нозик дидга эга эканлигини биларди. Шунинг учун ҳам у келгусида энг яқин дугонаси бўладиган аёл билан учрашгунга қадар стилист бўлиб ишлайди. Бир куни у Мейга яхшироқ кийиниши кераклигини айтиб, унинг гардеробидаги бир талай либослар ичидан атиги 6 та кийимни олиб қолади, қолганларини эса ташлаб юборади. Ўша пайтда Мей фақат костюм, 2 та кофта, бир жуфт пойабзал ва сумка сотиб олишга қодир эди. У бошқа нарса сотиб олиш имкониятига эга бўлгунча шу кийимларни алмаштириб кийиб юради.

Мей анча вақтгача болаларини арзон ва тўйимли овқат билан таъминлаш учун кийимларини арзон-гаров дўконлардан сотиб олади. Кундалик харажатларига етарли пул топиш учун жуда кўп ишлайди, ҳатто бир вақтнинг ўзида 5 та жойда ишлаган пайтлари ҳам бўлган. Бу ҳақда Мей шундай дейди: «Кун бўйи ишлаганим учун ҳеч қачон ўзимни айбдор ҳис қилмайман. Бундан бошқа иложим ҳам йўқ эди. Болаларга ғамхўрлик қилиш биринчи галдаги вазифам эди. Ётишга бошпанам, ейишга овқатим ва арзон бўлса-да кийишга кийимим бўлиши учун кўп меҳнат қилардим».

Болалари ёшлигиданоқ иш бўйича кичикроқ топшириқларни бажариб, оналарига ёрдам беришди — қизи Тоска доим унинг кабинетига келиб, шифокорларга хат ёзарди; Илон матн просессори қандай ишлашини тушунтирарди; кенжа ўғли Кимбал ҳам ўзича ёрдам берарди. Мей ота-онаси уни қандай тарбиялаган бўлса, у ҳам ўз фарзандларини шундай тарбиялаганини таъкидлайди. Уларни мустақил, меҳрибон, ҳалол, эътиборли ва одобли бўлишга ўргатган. Ҳеч қачон уларга кичик болалар каби муносабатда бўлмаган, ҳатто уй вазифаларини текширмаган.

У ўғли Илоннинг даҳо эканини 3 ёшидаёқ билган — уни «гениал бола» деб атаган. Мей бу ҳақда шундай дейди: «У мен билан ҳамма нарса ҳақида гаплашарди, кузатувчан ва жуда қизиқувчан эди». Деярли ҳар бир интервьюсида Мей барча фарзандлари билан фахрланишини такрорлашдан чарчамайди. Кейинчалик қизи Тоска режиссёр ва продюсер бўлди, Илон Teslaнинг асосчиси ва даҳосига айланди, кенжа ўғли Кимбал эса ресторанлар тармоғи эгаси бўлди.

50 йиллик маррага эришгандан сўнг Мей Маскнинг моделлик карьераси юқорига кўтарила бошлади. У болалар бўтқаси, косметика брендларининг реклама роликларида суратга тушади, шунингдек, Time журналининг суратга олиш ишларида иштирок этади. 2015 йилда у IMG Моделс номли йирик халқаро агентлик билан шартнома имзолайди.

69 ёшида модель CoverGirl косметика брендининг энг кекса вакилига айланади. 74 ёшида Мей журнал учун чўмилиш кийимида суратга тушади. У буни шундай изоҳлайди: «Мен аёллар журнал муқовасидаги шу расмимга қараб, қоматларидан хижолат тортмасдан пляжга боришларини хоҳлайман».

2019 йилда Мей ўзининг «Режали аёл. Бахтли ҳаёт қоидалари» номли мемуарини нашрдан чиқарди. Китобда у кексалик ҳақидаги қарашлари, шунингдек, бошқа одамлардан келадиган салбий энергияни дарҳол йўқ қилиш кераклиги ҳақидаги фикрлари билан ўртоқлашади. У ўз муҳитини ўзгартиришни ва ёмон одамларни ундан четлаштиришни ўргангани ҳақида шундай дейди: «Агар бераҳм одамлар билан мулоқот қилсак, азоб чекишни бошлаймиз. Аксинча, атрофимизни меҳрибон инсонлар билан ўраб олишимиз керак».

Модель ҳали ҳеч ким ундан юз торттириш ёки ботокс инъекцияларини қилишни сўрамаганини алоҳида таъкидлайди. Аммо унинг қўшимча қилишича, агар бу нарса иши учун жуда зарур бўлса, бу ҳақда ўйлаб кўриши мумкин. Ҳозирча Мей айни ҳолатидан мамнун.

Мей фарзандларини ҳаётидаги энг катта ютуғ деб ҳисоблайди. Бугунги кунда модель кўп вақтини 13 нафар набираси билан ўтказади. Шунингдек, севимли итига ҳам вақт ажратади. Модель уйда бўлганида кучугини кунига 4 марта сайрга олиб чиқади. Мей жисмоний машқларни ҳам эътиборидан четда қолдирмайди: у ҳар куни велотренажёрда 30 дақиқа, мушаклари учун 10 дақиқа ва эгилиб-букилиш учун 20 дақиқа ажратади.

Моделнинг айтишича, ёшлигида уни ҳар куни учрашувларга таклиф қилишган. Ҳозир эса даъвогарлар камроқ, аммо у буни нормал ҳолат деб ҳисоблайди. Мейнинг айтишича, у кўпи билан бир соат эркак кишининг бахтсиз ҳаёти ҳақидаги нолишларини тинглаши мумкин, қолган вақтини дўстлари ва ити билан ўтказишни афзал кўради. «Мен ҳатто энг яхши ресторанларга ҳам учрашув баҳона боришни хоҳламайман. Мен уларга аҳамият бермайман».

Мей Маск яна турмуш қуриш ва нафақага чиқиш ҳақида ҳеч қачон ўйламайди, унинг онаси ҳам нафақага чиқмаганлигини таъкидлайди. «Мени ҳеч ким подиумда ёки журналларда кўришни хоҳламагунча ишлайман. Агар бу содир бўлса ҳам, севимли ишим — тўғри овқатланиш бўйича фаолиятимни давом эттираман. Аммо модель 100 ёшга яқинлашганида дам олишини истисно қилмайди.