Buyuk Britaniyada dunyodagi eng keksa erkak vafot etdi. Jon Tinnisvud 112 yoshda bo‘lgan. Bu haqda Sky News xabar berdi.
Tinnisvud 1912-yil 26-avgustda mashhur “Titanik” layneri cho‘kib ketgan yili Liverpulda tug‘ilgan. U 2024-yil aprel oyida venesuelalik 114 yoshli Xuan Visente Peresning o‘limidan so‘ng sayyoradagi eng keksa erkakka aylangandi. Jon Tinnisvud 25-noyabr kuni Sautportdagi qariyalar uyida vafot etgan.
Uning so‘nggi kuni musiqa sadolari ostida va muhabbat qurshovida o‘tdi, deydi marhumning qarindoshlari.
Oila uzoq yillar davomida unga g‘amxo‘rlik qilgan barcha kishilarga, jumladan Hollies qariyalar uyi xodimlari, shifokorlar, hamshiralar, fizioterapevtlarga minnatdorlik bildirdi.
Tinnisvud ikkala jahon urushini ham boshdan kechirgan. Ikkinchi jahon urushi davrida u armiyaning moliya korpusida administrativ lavozimda xizmat qilgan. Uning vazifalari hisob-kitob yuritish, audit o‘tkazish, oziq-ovqat ta’minotini tashkil etish va askarlarni evakuatsiya qilishda ko‘maklashishni o‘z ichiga olgan.
Urushdan so‘ng u 1972-yilda nafaqaga chiqqunga qadar Shell va BP kompaniyalarida buxgalterlik faoliyatini davom ettirdi.
Jon rafiqasi Blodvenni Liverpuldagi raqs kechasida uchratgan. Er-xotin 1986-yilda rafiqasi vafot etgunga qadar 44 yil birga yashashgan. Ularning Syuzan ismli qizi, to‘rt nabirasi va uch chevarasi bor.
U ajoyib fazilatlarga ega inson edi: aqlli, qat’iyatli, har qanday vaziyatda xotirjam, ajoyib matematik qobiliyatlar va suhbat olib borish iste’dodiga ega bo‘lgan, dedi Tinnisvudning yaqinlari.
Izoh (0)