Бутун дунёдаги кино саноатида ажойиб янгиликлар шунчалик кўпки, барча янги фильмлар билан танишишга доим ҳам вақт топа олмаймиз. Бундай вақтда ёрқин воқеаларни ўзида жамлайдиган ва бир кечада томоша қилиш мумкин бўлган мини сериалларни тавсия қиламиз. РБК-Украина нашри сўнгги йилларда чиққан 5 та энг қизиқарли мини сериалларни тўплади.
“Бегуноҳ” (Ҳарлан Кобен)
Матео Видаль исмли талаба муштлашувда тасодифан бир одамни ўлдириб қўяди ва 9 йилга озодликдан маҳрум бўлади. Аммо қамоқдан чиққач, ўтмишни унутишга ва янги ҳаёт бошлашга қарор қилади. Укаси уни адвокатлик фирмасига ишга жойлаштиради.
Метеонинг шахсий ҳаёти яхшиланади, унинг рафиқаси ҳомиладор бўлади ва ёш оила янги уй харид қилади. Барчаси яхши кетаётган бир вақтда Метеонинг рафиқаси хизмат сафарига кетади ва унинг телефонидан ғалати хабарлар кела бошлайди. Сўнг шубҳали йигит уни машинада уриб юборади ва Метеога қурол билан таҳдид қилади. Тушунарсиз воқеалар кетма-кетлиги қаҳрамонни боши берк кўчага олиб келади.
“Бир кеча”
Сериалдаги воқеалар бир эркакнинг гўзал аёл билан тасодифан танишуви ва у билан тунаб қолиши билан бошланади. Эрталаб эса эркак унинг жасади ёнида уйғонади. Шубҳасиз, эркак асосий гумондорга айланади, бироқ у кечаси нима бўлганини эслай олмайди. Сюжет биринчи дақиқаларданоқ ўзига жалб қилади ва шунинг учун барча эпизодларни охиригача томоша қилишни хоҳлайсиз.
“Кўзлар ортида”
Луиза исмли ёлғиз она барда келишган эркак билан танишади ва у билан ишқий муносабатда бўлади, аммо тез орада Девид унинг янги раҳбари эканлиги маълум бўлади. Девид оилали эканлигини билса ҳам Луиза бу муносабатларни тўхтата олмайди.
Вақт ўтиши билан аёл Девид рафиқасининг яқин дугонасига айланади ва ушбу оилада қандайдир ваҳший ишлар яширинганидан шубҳалана бошлайди. Сериалдаги севги учбурчаги, драматик ва олдиндан айтиб бўлмайдиган воқеалар томошабинни ҳар бир эпизодда ҳайратда қолдиради.
“Аввалги аёл”
Жейн фарзандидан айрилгач, ҳаётини нолдан бошлайди ва архитектор Эдвард Монкфорд томонидан қурилган “ақлли” уй бунга эришишда ёрдам беришига умид қилади. Вақт ўтиши билан уйда ғайриоддий воқеалар содир бўла бошлайди ва Жейн яшаш жойининг сирларидан воқиф бўлади. У ерда аввал яшаган ва Жейнга жуда ўхшаш ташқи кўринишга эга аёлнинг вафот этгани уни қўрқита бошлайди.
“Оливия Киттериж”
Мини сериалда бутун умрини иш ва оиласига бағишлаган кекса аёл ҳақида ҳикоя қилинади. У узоқ йиллар давомида математика ўқитувчиси бўлиб ишлаган ва ҳар доим ўзини дунёдан нафратлангандек тутган. Сериалда бош қаҳрамоннинг 25 йиллик умри ва ундаги яширин маъноли воқеалар ўрин олган.
Изоҳ (0)