Харьков яқинида ҳужум уюштирган рус қўшинлари бир ҳафта ичида Украина ҳудудининг 278 квадрат километрини эгаллаб олди. Бу ҳақда Америка урушни ўрганиш институти (ISW) маълум қилди.
Қайд этилишича, Харьков яқинида 9 майдан 15 майгача бўлган даврдаги ҳужум пайтида Украина ўз ҳудудининг 257 квадрат километрини бой берган. Россия қўшинлари фронтнинг бошқа тармоқларида, хусусан, Украина жанубидаги Работино қишлоғи ҳисобидан яна 21 квадрат километрни эгаллаб олган.
Россия—Украина уруши бошланганидан бери, ISW маълумотларига кўра, Россия Украина ҳудудининг жами 12 фоизини (65,3 минг квадрат километр) эгаллаб олган. 2014 йилда аннексия қилинган Қрим ушбу ҳисоб-китобларда ҳисобга олинмаган.
Россиянинг Харьков вилоятига ҳужуми
Россия армияси 10 май куни эрталаб Харьков вилоятига ҳужум бошлаган эди. 16 майга қадар Россия Қуролли кучлари минтақадаги ўнга яқин аҳоли пунктларини босиб олишга муваффақ бўлган. Улар орасида Плетеневка ва Гатише, Борисовка, Огурцово, Пилная ҳамда Стрелечья бор.
16 май куни Россия Мудофаа вазирлиги Шимолий кучлар гуруҳи бўлинмалари душман мудофаасига кириб келгани, Kraken ва хорижий легион тузилмалари, 125-мудофаа бригадасининг ишчи кучи ва техникаси, Харьков вилоятининг Дергачи, Липци ва Волчанск аҳоли пунктлари ҳудудларида 15-чегара отряди кучларини мағлубиятга учратгани ҳақида хабар берди.
Изоҳ (0)