Украина ҳукумати Россия «Рождество сулҳи» якунида Харьков ва Запорожье вилоятларини ўққа тутганини маълум қилди

8 январга ўтар кечаси Россия қўшинлари Харьков вилоятининг Мерефа шаҳрига ракета ҳужуми уюштирди, деб хабар қилди вилоят ҳарбий бошқармаси бошлиғи Олег Синегубов.

Унинг сўзларига кўра, отишма оқибатида 50 ёшли эркак ҳалок бўлган. «Ҳатто Рождествода ҳам душман тинч аҳоли террорини тўхтатмаяпти!» — деб ёзди Синегубов Telegram каналида.

Бундан ташқари, Запорожье шаҳар кенгаши котиби Анатолий Куртевнинг маълум қилишича, аввалроқ эълон қилинган ўт очишни тўхтатиш режимига қарамай, якшанбага ўтар кечаси Россия армияси Запорожье чеккасида ўқ узган. У етказилган зарар ва қурбонлар ҳақида маълумот бермади.

Запорожье вилояти ҳарбий бошқармаси раҳбари Александр Старух ҳам 7 январь куни эрталаб россияликлар БМТнинг вилоятдаги Орехов шаҳрига гуманитар ёрдам олиб келган миссиясини ўққа тутганини айтди.

Донецк вилояти ҳарбий маъмурияти раҳбари Павел Кириленконинг ёзишича, тунда руслар Краматорскка еттита, Константиновкага иккита ракета ҳужуми уюштирган. Саноат объектлари шикастланган, ҳеч ким жабрланмаган.

Херсонда ҳам тунги портлашлар қайд этилган.

Украина Қуролли кучлари Бош штабининг 8 январь эрталабки ҳисоботида айтилишича, Россия ҳарбийлари, оташкесим эълон қилинганига қарамай, сўнгги 24 соат ичида тўққизта ракета ва учта авиация ҳужуми уюштирган, ёппасига ўт очиш тизимларидан жумладан фуқаролик инфратузилмасига 40 марта ўт очган.

5 январь куни Владимир Путин Россия Мудофаа вазирлигига Украинада 36 соат — 2023 йил 6 январь соат 12:00 дан 7 январь 24:00 га қадар фронт чизиғи бўйлаб ўт очишни тўхтатиш режимини эълон қилишни буюрганди. Бу Патриарх Кириллнинг «Рождество сулҳи» ҳақидаги чақириғидан кейин содир бўлди. Бир томонлама сулҳ кучга киргандан сўнг, Киев ва Вашингтон Россия қўшинлари жангни давом эттирганини хабар қилди. Россия Мудофаа вазирлиги улар ўт очишни тўхтатиш режимига риоя қилаётгани, бироқ Украина томонидан бўлаётган ҳужумга жавоб бераётганини даъво қилди.