Британиянинг The Times газетаси Украина бир неча ой ичида ўз ядровий қуролини яратиш имкониятига эгалигини маълум қилди. Украина Ташқи ишлар вазирлиги эса бунга муносабат билдирди.
Украина ядро қуроли ишлаб чиқарадими?
Украина Ядро қуролини тарқатмаслик тўғрисидаги шартномага амал қилади; биз ядровий қуролга эгалик қилмаймиз, ишлаб чиқмаймиз ва яратмоқчи эмасмиз. Украина МАГАТЭ билан яқиндан ҳамкорлик олиб боради ва унинг назорати учун тўлиқ очиқ, бу эса ядровий материаллардан ҳарбий мақсадларда фойдаланиш имкониятини истисно қилади, деб таъкидлади Ташқи ишлар вазирлиги расмийси Георгий Тихий.
The Times нашрига кўра, агар АҚШнинг янги президенти Дональд Трамп ҳарбий ёрдамни қисқартирса, Украина оддий ядро бомбасини ишлаб чиқиши мумкин. Мазкур маълумотлар Украина Мудофаа вазирлиги учун тайёрланган ҳисоботда акс этган. Ҳисоботни армия, конверсия ва қуролсизланиш тадқиқотлари маркази, Украинанинг нуфузли ҳарбий таҳлил маркази тайёрлаган.
Газета иқтибос келтирган ҳужжатда айтилишича, Украина 1945 йил август ойида АҚШ Япониянинг Нагасаки шаҳрига ташлаган Fat Man бомбасига ўхшаш технология бўйича плутоний қурилмасини тезда яратиши мумкин.
Манхеттен лойиҳаси доирасида Қўшма Штатлар каби оддий атом бомбасини яратиш 80 йилдан кейин қийин вазифа бўлмайди, дейилади ҳисоботда.
Яратилган бомбанинг қуввати Fat Man қувватининг тахминан ўндан бирига тенг бўлиши таъкидланмоқда.
Бу бутун бир Россия авиабазасини ёки тўпланган ҳарбий, саноат ёхуд логистика объектларини йўқ қилиш учун етарли бўларди. Ядро зарядининг аниқ қувватини олдиндан айтиб бўлмайди, чунки унда турли хил плутоний изотоплари қўлланади, деди ҳисобот муаллифларидан бири, Миллий стратегик тадқиқотлар институти бўлим бошлиғи Алексей Ежак.
Мақолада Украина уранни бойитиш учун зарур бўлган катта иншоотларни қуриш ва ишлатишга вақт сарфламаслик учун, эҳтимол, ядро реакторларининг ишлатилган ёнилғи стерженларидан олинган плутонийдан фойдаланиши мумкинлиги айтилган. Қуролсизланиш масалалари бўйича мутахассис Павел Подвиг мақолани “мутлақ ақлдан озиш” деб баҳолади.
Чамаси, Украина “юзлаб турдаги қурол” яратиш учун фойдаланиши мумкин бўлган етти тонна плутонийга эга, деган далил келтирилмоқда. Бироқ бу плутонийнинг барчаси ишлатилган ёнилғида жойлашган. Уни ажратиб олиш учун Украинада мавжуд бўлмаган қайта ишлаш заводи зарур, деди Подвиг.
Изоҳ (0)