Владимир Путин Россия Харьков шаҳрига ҳужум қилиш ниятида эмаслигини айтди.
Унинг сўзларига кўра, Харьков чегарасидаги операция буфер зона яратиш ва Россия ҳудудларини Украина Қуролли кучлари томонидан ўққа тутилишидан ҳимоя қилиш учун зарур.
“Бу уларнинг ҳам айби, чунки улар ўққа тутди ва, афсуски, чегара ҳудудларидаги турар жойларни, шу жумладан, Белгородни ўққа тутишда давом этмоқдалар. У ерда тинч аҳоли ўлмоқда. Ҳаммаси очиқ-ойдин кўриниб турибди-ку. Улар тўғридан тўғри шаҳар марказини, турар жойларни ўққа тутмоқда. Ва агар шундай давом этса, биз хавфсизлик зонаси, санитария зонаси яратишга мажбур бўламиз, деб очиқ айтдим. Биз шундай қиляпмиз”, — дея тушунтирди Владимир Путин.
Президент Россия қўшинлари Харьков йўналишида қатъий режа бўйича ҳаракатланаётганини таъкидлади. Шу билан бирга, “бугунги кунда Ғарб матбуоти фаол ёзаётган Харьковни олиш режалари йўқлиги”ни ҳам қўшимча қилди.
11 май куни Россия Мудофаа вазирлиги Харьков вилоятидаги бир қанча қишлоқлар ўз назоратига ўтганини маълум қилганди. Эртаси куни Россия ҳужумини Украина президенти Владимир Зеленский тасдиқлади. Reuters манбаларининг айтишича, Россия Харьков вилоятида 10 км буфер зона яратмоқчи.
Охирги марта Белгороднинг жиддий ўққа тутилиши 12 май куни содир бўлган. Россия Мудофаа вазирлиги тарқатган хабарга кўра, шаҳар узра уриб туширилган Украина ракетасининг парчаси Шорса кўчасидаги 55а-уйнинг подъездига келиб тушган. Оқибатда ўн қаватнинг ҳаммаси қулаб тушди. 17 киши ҳалок бўлди.
Изоҳ (0)