2023 йил январида Россия ҳукумати 2022 йил кузида армияга чақирилган 300 минг россияликка қўшимча равишда яна 500 минг ҳарбийни сафарбар этмоқчи. Бу ҳақда Британиянинг The Guardian газетасига Украина Мудофаа вазирлиги Ҳарбий разведка бош бошқармаси раҳбари ўринбосари Вадим Скибицкий маълум қилди.
Унинг даъво қилишича, Россияда сафарбарликнинг янги тўлқини қишки байрамлардан кейин, 15 январь куни эълон қилинади. Украина разведкаси тахмин қилишича, Россияга ҳарбий гуруҳларни тайёрлаш учун қарийб икки ой керак бўлади, Москванинг жанг майдонидаги ҳар қандай ютуғи эса россияликлар қай даражада яхши қуролланганига боғлиқ бўлади. Скибицкийнинг сўзларига кўра, кўп нарса, шунингдек, Украинага Ғарбдан ўқ-дори ва қурол-яроғлар етказилишининг давом эттирилишига ҳам боғлиқ бўлади.
«Агар Россия бу босқичда мағлуб бўлса, у ҳолда Путин ҳалокатга учрайди», — деган фикрда Украина разведкаси, улар келаётган олти-саккиз ой давомида фронтдаги вазият «сўнгги зўр бериш» ҳолатида бўлишини айтмоқда.
«Улар Донецк ва Харьков вилоятларида, шунингдек, эҳтимол Запорожье вилоятида ҳужум ҳаракатларига ўтишини, Херсон ва Қримда эса мудофааланишини кутяпмиз. Бу вазифаларни амалга ошириш учун уларга айнан шунча ҳарбийлар керак бўлади», — деди Скибицкий Украина Мудофаа вазирлиги Россияда сафарбарликнинг янги босқичи бошланишини кутаётгани сабабини изоҳалр экан.
Украина президенти Владимир Зеленский 3 январь куни кечки мурожаатида Россияда гўёки «янги сафарбарлик жараёнлари» тайёрланаётгани ҳақида гапирганди. Зеленский бу мавзуда Канада, Нидерландия, Буюк Британия ва Норвегия бош вазирлари билан 3 январь кунги телефон суҳбатлари чоғида гаплашган.
30 декабрь куни Украина мудофаа вазири Олексий Резников январь ойи бошида Россия ҳукумати эркаклар учун чегараларни ёпиб, ҳарбий ҳолат эълон қилмоқчилиги ва сафарбарликнинг навбатдаги тўлқинини бошламоқчилигини айтганди. Украина Мудофаа вазирлигининг бош разведка бошқармаси бошлиғи Кирилл Будановнинг айтишича, сафарбарликнинг янги тўлқини гўёки 5 январдан бошланади.
Резников ҳам, Буданов ҳам бундай маълумотни қаердан олганига изоҳ бермади. Шу билан бирга, Украина Қуролли кучлари бош штаби 31 декабрь куни эрталабки ҳисоботида Қрим ҳудудида 2023 йил январь ойида ҳарбий хизматга чақирилиши лозим бўлган шахслар рўйхати тузилгани ҳақида маълум қилди.
Россияда қисман сафарбарлик 21 сентябрь куни эълон қилинганди. 28 октябрь куни мудофаа вазири Сергей Шойгу сафарбарлик якунлангани ва берилган барча топшириқлар бажарилгани ҳақида ҳисобот берди. Шу билан бирга Путин сафарбарлик якунлангани ҳақида расмий ҳужжат имзоламаган.
Изоҳ (0)