23 январь куни эрталаб рус қўшинлари Украинага катта ҳужум уюштирди. Украина Ички ишлар вазирлигининг сўнгги маълумотларига кўра, Киев, Харьков ва Днепропетровск вилоятларининг ўққа тутилиши оқибатида тўрт киши ҳалок бўлган, бир фуқаро клиник ўлим ҳолатида, 50 дан ортиқ одам жароҳатланган.
Украина Қуролли кучлари бош қўмондони Валерий Залужнийнинг айтишича, Россия қўшинлари қанотли, баллистик, авиация ва зенит ракеталари ёрдамида Украина ҳудудига жами 41 та ракета учирди. Унга кўра, Украина ҳаво ҳужумидан мудофаа кучлари 21 та ракетани уриб туширган: 15 та Х-101/Х-555/Х-55 қанотли ракеталари, “Искандер-М” мажмуасидан учирилган бешта баллистик ракета, шунингдек, битта Х-59 бошқариладиган ракета. Украина Қуролли кучлари бош қўмондони таъкидлашича, баллистик траектория бўйича отилган Россия ракеталарининг ҳаммаси ҳам нишонга етиб бормаган.
Россия ҳарбийлари Украина пойтахтига бир неча босқичда ҳужум қилди, деди Киев ҳарбий маъмурияти раҳбари Сергей Попко. Аввалига Россия қўшинлари Саратов вилоятидан Ту-95МС стратегик бомбардимончи самолётларидан Х-101/Х-555/Х-55 қанотли ракеталарини, кейин эса қуруқликдаги баллистик ракеталарни учирган. Ҳаво мудофаа кучлари “қарийб йигирмата” ракетани уриб туширган.
Ҳужумда шаҳарнинг бир қанча ҳудудлари шикастланган. Шаҳар ҳарбий маъмурияти маълумотларига кўра, Святошинский туманида автомобиллар ёниб кетган, кўп қаватли турар жой биносининг квартираларидан бирида ёнғин содир бўлган. Шу ва Печерский туманларида ҳам нотурар жой бинолар зарар кўрган. Соломенский туманида турар жой биносига зарар етган, Дарницкий туманида урилган ракета парчалари кўп қаватли уй томи ва болалар боғчаси ҳудудига қулаган.
Шаҳар мэри Виталий Кличконинг айтишича, Святошинский туманидаги уйнинг хонадонларидан бирида портламай қолган ракета каллаги топилган. Уй аҳолиси эвакуация қилинган. Худди шу ҳудуддаги бошқа бинонинг биринчи қаватидан бешинчи қаватигача бўлган балконлари ва тўртта хонадон вайроналардан зарар кўрган.
Шаҳар ҳарбий маъмурияти Киевдаги отишмада бир киши ҳалок бўлганини маълум қилди. Кличконинг сўнгги маълумотларига кўра, шаҳарда жабрланганлар сони 18 киши: 10 нафар катта ёшли одам ва уч бола касалхонага ётқизилган, яна тўрт кишига воқеа жойида тиббий ёрдам кўрсатилган. Кличко марҳум ҳақидаги маълумотни рад этмоқда. Унинг сўзларига кўра, фуқаро реанимацияга ётқизилган, у тирик.
Кейинроқ Украина Ички ишлар вазирлиги киевлик аёл клиник ўлим ҳолатида экани, шифокорлар унинг ҳаёти учун курашаётгани ҳақида хабар берди. Яна 21 киши жароҳатланган.
Киев вилояти ҳудудида уриб туширилган ракета парчалари тушиши оқибатида уч киши жароҳат олган. Турли районларда учта кўп қаватли уй, хусусий уй, хўжалик бинолари, 12 та енгил автомобиль, кафе шикастланган, турар жойлардан бирининг автотураргоҳида ёнғин келиб чиққан.
Шунингдек, Россия қўшини Харьков шаҳрининг Киев ва Салтивка районларига зарба берган, деб хабар қилди вилоят ҳарбий маъмурияти раҳбари Олег Синегубов. Украина ИИВ маълумотига кўра, шаҳарда камида уч киши ҳалок бўлиб, 40 га яқин киши жароҳатланган. Маҳаллий расмийлар жабрланганлар сони 35 нафарлиги, улардан икки нафари ёш бола эканини хабар қилган. Кўп квартирали турар жой шикастланган, хусусий уй, ўқув муассасаси биноси ҳамда бошқа фуқаролик инфратузилмалари вайрон бўлган, автомобиллар ёниб кетган.
Харьков мэри Игор Тереховнинг хабар қилишича, зарба оқибатида турар жой биносининг подъездларидан бири тўлиқ вайрон бўлган. Харобалар остида одамлар қолган бўлиши мумкин. Киев туманининг зарба остида қолган қисми электр ва ичимлик сув таъминотидан узилган.
Миллий полициянинг Харьков вилояти бўйича тергов бошқармаси бошлиғи Сергей Болвинов зарбалар вақтида Харьковнинг чекка ҳудуди ҳам жабрланганини маълум қилган. Бу ҳудудда хусусий сектордаги турар жой шикастланган, болалар ва бир аёл жароҳат олган. Ракеталардан бири газ қувурига урилиши оқибатида ёнғин келиб чиққан.
“ТАСС” ахборот агентлиги Россия қўшини 23 январга ўтар кечаси “Харьковдаги ёлланма жангчилар манзили бўйлаб аниқ зарбалар бергани” ҳақида ёзди.
“Бу шахслар қайси мамлакатлар фуқаролари экани тўғрисида ҳозирча ишончли маълумот йўқ, аммо бу маълумотга ойдинлик киритилмоқда”, — деган агентлик манбаси. Фавқулодда хизматлардаги бу манба Харьковдаги турар жойга гўёки Украина Қуролли кучларининг ҳаво ҳужумидан мудофаа тизими ракетаси урилганини қўшимча қилган.
Днипропетровск вилоятининг Павлоград шаҳри ўққа тутилиши оқибатида бир киши ҳалок бўлиб, яна бир киши жароҳатланган, деб хабар берган регион ҳарбий маъмурияти раҳбари Сергей Лисак.
Украина президенти офиси раҳбари Андрей Ермак украин шаҳарлари ёппасига ўққа тутилишини “россияликлар террори” деб атади.
“Бу террорни фақат куч билан тўхтатиш мумкинлигини дунё тушуниши керак. Дунё яна шуни тушуниши керакки, россияликларнинг ракеталари ҳозир Украина бўйлаб учмоқда, аммо, агар бугун заифлик намойиш этилса, эртага улар ғарбдаги шаҳарлар устидан учади”, — деган у.
Россия президенти матбуот котиби Дмитрий Песков Россия қўшини тинч аҳолига зарба бермаслигини таъкидлади. У эрталаб Украинадаги объектлар бўйлаб йўлланган зарбаларни Донецк бўйлаб ҳужумга жавоб деб ҳисоблаш мумкинми, дея берилган саволга шундай жавоб қайтарган.
“Биз махсус ҳарбий амалиётимизни давом эттирмоқдамиз ва ҳарбийларимиз ижтимоий объектлар ва аҳоли кварталлари бўйлаб зарба бермаяпти. Киев режимидан фарқли ўлароқ, тинч аҳолига зарба бермаяпти. Бу бизнинг ҳарбийларни Киев режими ҳарбийларидан тубдан фарқлаб турадиган жиҳат”, — деган Кремль расмийси.
Изоҳ (0)