Буюк Британия Мудофаа вазири Жон Хили “мудофаа соҳасидаги атом реакторлари учун ядро ёқилғиси ишлаб чиқариш”ни тиклаш имкониятлари кўриб чиқилаётганини айтди.
Шу билан бирга, у Лондоннинг ядровий мажбуриятларга содиқлигини ва ядровий қуроллар учун парчаланадиган материаллар ишлаб чиқаришга ихтиёрий мораторийни яна бир бор тасдиқлади.
Ҳукумат мудофаа ядро ёқилғиси ишлаб чиқаришни модернизация қилишга содиқ. Биз ушбу дастурни амалга ошириш вариантларини ишлаб чиқиш учун саноат билан ҳамкорлик қилишни бошлаяпмиз, деди Хили UК Defence Journal нашрига берган интервьюсида.
Вазирнинг айтишича, ядровий ёқилғи ишлаб чиқариш цикли Буюк Британиянинг халқаро мажбуриятларига, жумладан, Ядро қуролини тарқатмаслик тўғрисидаги шартномага мос келади.
Буюк Британиянинг ядро бўйича режалари
Баҳорда Буюк Британия Энергетика вазирлиги юқори навли бойитилган уран ёқилғиси ишлаб чиқариш заводи қурилиши учун 196 миллион фунт стерлинг ажратилишини эълон қилганди.
Корхона 2031 йилда фойдаланишга топширилиши режалаштирилган.
Буюк Британия ядровий қуролга қанча маблағ сарфлайди?
Ядро қуролларини бекор қилиш бўйича халқаро кампания (ICАN) эълон қилган янги ҳисоботга кўра, ядровий давлатлар сўнгги беш йил ичида ўз арсеналларини модернизация қилиб, ядровий қуролга сарфланадиган харажатларни учдан бир қисмга оширган.
-LbKiUg4s-Uoa8PbqI.jpg)
ICАN маълумотларига кўра, тўққизта ядровий давлат — АҚШ, Хитой, Ҳиндистон, Россия, Франция, Буюк Британия, Исроил, Покистон ва Шимолий Корея ўтган йили ядро арсеналларига жами 91 миллиард доллар сарфлаган. Бу маблағнинг 51,5 миллиард доллари АҚШ улушига тўғри келади. Иккинчи ўринда Хитой (11,8 миллиард доллар), учинчи ўринда Россия (8,3 миллиард доллар) етакчилик қилмоқда.
Буюк Британия эса 2023 йилда ядро қуроли учун 8,1 млрд доллар сарфлаган.
Изоҳ (0)