Россия армияси сафига жалб қилинган 18 нафар Шимолий Корея ҳарбийлари Украинанинг Брянск ва Курск вилоятлари билан чегарасидаги позицияларидан қочиб кетган. Бу ҳақда Украина разведкасидаги манбалар хабар берди.
Маълум қилинишича, бу Украина билан давлат чегарасидан 7 километр узоқликда содир бўлган. КХДР ҳарбийларининг қочиш сабаблари ҳозирча аниқланмаган.
“Россия ҳарбийлари уларни қидиришни бошлаган, бироқ улар бу маълумотни олий қўмондонлигидан яширишга ҳаракат қилмоқда”, дейилади хабарда.
Россия армиясининг 11-алоҳида гвардия десант-штурм бригадаси негизида КХДР фуқароларидан иборат бўлган, “махсус бурят батальони” деб номланган ҳарбий бўлинма ташкил этилмоқда. Разведка маълумотларига кўра, шахсий таркибнинг тахминий сони 3000 нафарни ташкил этади.
батальонда ўқотар қуроллар ва ўқ-дорилар билан таъминлаш жараёни олиб борилган. Тахминларга кўра, ушбу бўлинма Россиядаги Сужа аҳоли пункти ва Курск шаҳри яқинидаги жанговар вазифаларни бажаришга жалб этилиши мумкин.
КХДРнинг Россия-Украина урушидаги роли
2024 йил январь ойида Шимолий Корея Россияга қуроллар бераётгани ҳақида дастлабки далиллар пайдо бўлди. Экспертиза январь ойи бошида россияликлар Харьковга айнан Шимолий Корея ракетаси билан зарба берганини тасдиқлади. Бундан ташқари, Украина разведкаси маълумотларига кўра, КХДР 1970-1980 йилларда Россияга бир ярим миллион артиллерия ўқ-дориларини жўнатган.
Июнь ойида эса РФ ва КХДР кенг қамровли стратегик шериклик тўғрисидаги шартномани имзолаган. У Пхеньян ёки Москвага қарши тажовуз қилинган тақдирда ўзаро ҳарбий ёрдам кўрсатишни назарда тутади.
Украина президенти Владимир Зеленский Шимолий Корея Россия армиясига нафақат қурол-яроғ, балки шахсий таркиб ҳам етказиб беришини айтган. 2023 йили Украина Мудофаа вазирлиги разведка бош бошқармаси Шимолий Корея ҳарбийларининг чекланган контингенти, хусусан, муҳандислик қўшинлари бўлинмалари Украинанинг вақтинча босиб олинган ҳудудига келгани ҳақида хабар берганди.
Изоҳ (0)