Қўшма Штатлар Украинанинг 1,5 миллион аҳолига эга Харьков шаҳрига қаратилган Россия ҳужумидан ҳимоя қилиш, Украина армиясини қурол-яроғ билан таъминлаш учун кеча-ю кундуз ишламоқда. Бу ҳақда Оқ уй вакилига таяниб, Deutsche Welle хабар берди.
Руслар Харьковга каттароқ ҳужумга тайёрланаётган бўлиши мумкин, — деди Оқ уй Миллий хавфсизлик кенгашининг стратегик алоқалар бўйича координатори Жон Кирби.
Унинг сўзларига кўра, Россия Харьков йўналишида узоқ масофага ўқ узишга тайёрланаётгани ҳақида хавотирли аломатлар бор.
Шу куни Украина Мудофаа вазирлиги Россия армиясининг Харьков вилояти чегарасида ҳаракатлари фаоллашгани ҳақида баёнот берган эди. Мудофаа вазирлиги фронтнинг ушбу секторида мудофаани кучайтириш учун захира бўлинмалари юборилганини маълум қилган.
Волчанск йўналишида 24 соат давомида душман бошқариладиган ҳаво бомбалари (КАB) ёрдамида ҳаво ҳужумларини амалга оширди. Тунда рус босқинчилари артиллерия кўмагида мудофаамизнинг олдинги чизиғига ўт очишни кучайтирди. Тахминан эрталаб соат 5 да зирҳли техникалар ёрдамида мудофаа чизиғини ёриб ўтишга уриниш содир бўлди, — дейилади Украина армияси баёнотида.
Россия ҳарбий Telegram каналлари хабарига кўра, Россия армияси Россия билан чегарадош Харьков томон юра бошлаган. Хусусан, Гоптовка, Красное, Пильная, Стрелечья, Волчанск ва Борисовка чегарадош аҳоли пунктларини оммавий ўққа тутган.
Урушни ўрганиш институти (ISW) фикрича, Россия бундай ҳаракатлари билан Харьков аҳолисини шаҳарга эҳтимолий ҳужумдан қўрқиб қочишга мажбурламоқчи.
Изоҳ (0)