Россия федерациясининг бир нечта йирик шаҳарларида Қирғизистон Республикаси Ички ишлар вазирлигининг ваколатхоналари ўз фаолиятини бошлади. Бу ҳақда Қирғизистон ИИВ матбуот хизмати хабар бермоқда.
Таъкидланишича, ватандошларнинг ҳуқуқ ва манфаатларини ҳимоя қилиш ҳамда ноқонуний хатти-ҳаракатларга йўл қўймаслик масалаларида кўмаклашиш мақсадида Қирғизистон ИИВ ваколатхоналари Москва, Санкт-Петербург, Екатеринбург ва Новосибирскда ўз фаолиятини бошлаган.
Маълум қилинишича, Қирғизистон ИИВнинг РФдаги ваколатхонаси ва Россия ИИВ Халқаро ҳамкорлик бошқармаси раҳбарияти ўртасидаги учрашувда идоралараро ҳамкорлик, жиноятчиликка қарши курашиш, наркотик жиноятларининг олдини олиш, фуқароларни, айниқса, ёшларни наркотик моддаларнинг ноқонуний айланишига жалб қилинишини бартараф этиш масалалари муҳокама қилинган.
“Россия ҳудудларида меҳнат фаолияти билан шуғулланаётган фуқароларимизнинг катта қисми борлигини ҳисобга олиб, уларнинг ҳуқуқ ва манфаатларини ҳимоя қилишда кўмаклашиш, шунингдек, ватандошларимиз томонидан жиноятлар содир этилиши ва ноқонуний хатти-ҳаракатларга йўл қўйилишининг олдини олиш мақсадида биз Россия Федерациясининг бир нечта шаҳарларида Қирғизистон ИИВ ваколатхоналари фаолиятини йўлга қўйдик”, дейилади Қирғизистон милицияси баёнотида.
Россия ИИВ ушбу ваколатхоналар ҳуқуқ-тартибот органлари ўртасидаги ҳамкорлик 2017 йил 20 июндаги ҳукуматлараро битим асосида амалга оширилишини эслатиб, ваколатхоналар ходимлари сони томонларнинг келишувига кўра белгиланишини эслатиб ўтган.
Ваколатхоналарнинг асосий вазифаси ўз мамлакатлари фуқароларига, жумладан, Қирғизистондан Россияга ва аксинча кўчиб ўтиш масалаларида ёрдам кўрсатишдан иборат бўлади.
Қайд этилишича, Россия Федерацияси миграция хизмати Қирғизистондан келган милиционерларга 72 мингдан ортиқ қирғизистонлик мигрантлар Россия қонунларини бузаётгани ҳақида маълумот берган.
Изоҳ (0)