Россия парламентининг қуйи палатаси ялпи мажлисида депутатлар мамлакатда ўлим жазосига қўйилган мораторийни бекор қилиш масаласини кўтарди. Муҳокамалар Crocus City Hall’даги теракт фонида бўлиб ўтди. Бу ҳақда Current Times хабар берди.
Хусусан, Россия либерал-демократик партияси етакчиси Леонид Слуцкий мораторийни бекор қилишни таклиф қилган ва унинг партияси аллақачон тегишли таклифларни тайёрлаётганини айтган. Коммунистик партия раҳбари Геннадий Зюганов Crocusъдаги терактни содир этганларнинг “ер юзида юришга ҳаққи йўқ”лигини айтган.
“Адолатли Россия — Ҳақиқат учун” партияси лидери Сергей Миронов унинг партияси террорчилар ва педофилларга ўлим жазосини қайтариш бўйича референдум ўтказишни талаб қилишини айтган. “Миронов референдумни 2024 йил 8 сентябрь, “Ягона овоз бериш” кунида ўтказишни хоҳлашларини қўшимча қилган.
Аннексия қилинган Қримдан Давлат думасининг “депутати” Михаил Шеремет ҳам ўлим жазосига қўйилган тақиқнинг бекор қилинишига эришиш ниятини эълон қилди. У Россия Конституциявий судига мораторийни бекор қилишнинг қонуний асослари бўйича сўров юборишини айтди.
Давлат думаси раиси Вячеслав Володин, ўз навбатида, ўлим жазосини қайтариш учун референдум ўтказишнинг ҳожати йўқ – Конституциявий суднинг қарори етарли эканини билдирди.
“Бугунги кунда Конституциявий суднинг ушбу нормаларни амалга оширишни кейинга қолдирадиган қарори бор. Биз Европа Кенгашидан чиқдик. Шунинг учун бу мавзу муҳокама талаб қилади”, — деб хулоса қилди Володин ва хавфсизлик соҳасидаги қонун ҳужжатларини таҳлил қилиш учун фракциялараро ишчи гуруҳ тузишни таклиф қилди.
Конституциявий суд муҳокамаларга изоҳ беришдан бош тортди.
Россияда ўлим жазоси қачон бекор қилинган?
Россия ўлим жазосига мораторийни 1997 йилда Европа Кенгашига қўшилганидан сўнг дарҳол киритган эди. Кейинчалик, Инсон ҳуқуқлари ва асосий эркинликларини ҳимоя қилиш тўғрисидаги Европа конвенциясига 6-сонли протокол имзоланган: айнан шу ҳужжат 1997 йил 16 апрелдан бошлаб Россияда ўлим жазосига мораторий киритган.
Мораторий 2010 йилда тугашидан олдин, 2009 йил ноябрь ойида Россия Конституциявий суди уни яна узайтирган. Конституциявий суднинг бу позицияси Россия 2022 йил октябрь ойида ташкилотни тарк этганида ва мамлакатда ўлим жазосини қўллаш ҳеч қандай халқаро шартнома билан чекланмаганига қарамай, ўзгармаган.
Ҳозирги кунда расман 64 та давлатда ўлим жазоси қўлланилади. Улар қаторида АҚШ, Хитой, Эрон, Саудия Арабистони, Ироқ, Покистон, Беларусь, Кувайт, Фаластин, Ҳиндистон, Япония ва Миср ҳам бор.
- Crocus City Hall’даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 139 киши ҳалок бўлган, 182 киши жароҳатланган. Ҳужумни содир этишда Тожикистоннинг тўрт нафар фуқароси айбланган, улар айбига иқрор бўлган.
- Мазкур ҳолатдан кейин Россияда мигрантларга нисбатан муносабат ўзгарган. Жумладан, аэропортда қирғизистонликлар ушлаб турилгани, ҳайдовчиларнинг миллати суриштирилаётгани ва иш берувчилардан мигрантлар ҳақида маълумот тақдим этиш талаб қилинаётгани айтилмоқда. Ўз навбатида, Россияга кириш ва чиқишни текшириш жараёни кучайган. Ҳолат юзасидан Қирғизистон Ташқи ишлар вазирилиги зарурат бўлмаса, Россияга ташриф буюрмасликни тавсия қилган.
Изоҳ (0)