«Муҳрсиз, имзосиз қаламда ёзилган қоғоз сабаб уйимиз бузиб ташланди». Қашқадарёлик фуқаро судни адолатсизликда айбламоқда

Қашқадарё вилоятининг Шаҳрисабз туманида яшовчи фуқаро Равшан Сатторов 2017 йил суд қарорига кўра, яшаб турган хонадони МИБ томонидан мажбурий тартибда бузиб ташланганини, суднинг бу қарорига муҳри, имзоси бўлмаган қоғоздаги маълумотлар асос бўлганини айтмоқда.

Уй-жойимиз 2017 йил суд қарорига кўра, мажбурий ижро томонидан буздириб ташланди. Уйда 7-8 нафар оила аъзоларимиз яшарди. Уйимиз бузилишига марҳум амакимнинг турмуш ўртоғи судга шикоят қилгани сабаб бўлди, — дейди мурожаатчи Равшан Сатторов.

Фуқаронинг билдиришича, марҳум амакисининг турмуш ўртоғи уларга тегишли ерга уй-жой қуриб олганини айтиб, судга даво киритган.

Бизда 6 сотихдан 12 сотихли иккита участка бор эди. Бири амакимники эди. Амаким вафот этгач, унинг аёли бизга тегишли ерга уй қуриб олгансизлар деб, уйимизни буздиришни сўраб судга мурожаат қилди. Мазкур ишни кўриб чиққан суд қалам билан ёзилган, на муҳри ва на имзоси бўлган бир парча қоғозни асос қилиб, уйимизни бузиш тўғрисида қарор чиқарди. Ачинарлиси бу қоғоздаги маълумотни на архитектура на кадастр тасдиқлаган. Кимнингдир уйидан топиб олинган қоғозда қалам билан ёзилган маълумотлар биз яшаб турган уйнинг бузилишига асос бўлди. Суд бу ҳақда қарорида ҳам ёзиб, ўша қоғозни уй схемаси сифатида қабул қилган, — дейди уйи бузиб ташланганини айтган мурожаатчи.

Равшан Сатторов судда уларга тегишли уй 1994 йилда қуриб битказилганини айтганини, аммо суд даъвогарнинг мазкур уй 1997 йил даъвогар томонидан қурилган пойдевор устида барпо этила бошланганини айтган гапига ишонганини таъкидламоқда.

Мен судга уйимиз 1994 йилда қуриб битказилганини исботловчи намунавий шартномани тақдим қилдим. Аммо суд даъвогарнинг ҳеч қандай ҳужжат тақдим қилмаса-да, бу уй улар томонидан 1997 йилда қурилган пойдевор устида барпо этилгани ҳақидаги гапига ишонди ва унинг даъвосини қўллаб-қувватлади, — дейди у.

Равшан Сатторов «Дарё» журналисти билан суҳбатида бу ҳақда шикоят қилиб, ҳатто Олий суд раиси қабулига ҳам кирганини ҳам маълум қилди.

Шу масала юзасидан 2022 йилнинг 19 октябрь куни Олий суд раиси қабулига ҳам кирдим. Кулгилиси, масъуллар, раиснинг ўзи эмас, у томонидан чақирилган судьялар ҳам қўлда ёзилган, ҳеч қандай имзо ёки муҳри бўлмаган бир парча қоғозни ҳужжат сифатида қабул қилишлари мумкинлигини айтиб, менга терс гапиришди. «Нега бир неча йиллардан бери тинчимайсан, келишсанг бўлади-ку», дея менга дакки ҳам беришди, — дейди Равшан Сатторов.

Мурожаатчи Олий суд масъулларидан ҳам ҳафсаласи пир бўлганини, бироқ Олий суд раисининг шахсан ўзидан умиди борлигини таъкидламоқда.

Олий суд масъуллари, судьялари ҳеч қандай имзоси ёки муҳри бўлмаган бир парча қоғозни ҳужжат сифатида қабул қилишларини, шу бир парча қоғоз билан уйлар бузиб ташланишини оқлашларини айтишгач, биз дардимизни кимга айтайлик. Шуми суднинг адолати? Шуми халқ ишонч билдирган Олий суд?, — дейди у.

Шаҳрисабзлик Равшан Сатторовнинг айтишича, мазкур адолатсизлик Чироқчи туманлараро суди судьяси Жамол Ҳамраев томонидан амалга оширилган.

Чироқчи туманлараро суди судьяси Жамол Ҳамраевнинг адолатсизлигидан шикоят қилиб, бошқа жойга мурожаат қилдик. Энг кулгилиси биз устидан шикоят қилган судьянинг ўзи яна шу ишни қайта кўрди. Жамол Ҳамраев бизнинг учта ишимизни ўзи кўрди. Биз бундан норози бўлиб, судья алмаштирилиши кераклигини сўраб, илтимосномалар киритдик. Аммо фойдаси бўлмади. Кўпчилик «энди фойдаси йўқ, боиси судьялар қарори Ўзбекистон Республикаси номидан чиқади, агар бу қарор бекор бўлса, уйни қайта қуриб бериш судья зиммасига тушиб, маблағ давлат бюджетидан қопланишини инобатга олишади ва барча судья бунга қарши туради», дейишяпти балки шу гапларда жон бордир, — дейди мурожаатчи.

Равшан Сатторов марҳум амакисига тегишли ер ҳамон бўш турганини, айни кунга келиб бузиб ташланган уй ҳам хароба ҳолга келиб қолганини, даъвогар айни кунда ҳам ерга ҳеч қандай уй қурмаганини айтиб, «ҳеч қандай асосларсиз, яшаб турган уйимиз бузиб ташланиб, биз кўчада қолдик», демоқда.

Олий суд раисининг қабулига кирганимда раис икки нафар судьяни чақирди. Улар фақат менга қарши гапириб, биринчи суд чиқарган қарорни рўкач қилишмоқда. Мен уларга судья қароридан ташқари иш ҳужжатлари билан ҳам танишиб чиқдингизми, нега фақат судья қарорини ўқиб, хулоса қиляпсиз», деб савол бердим. Саволимга жавоб беришни ҳам лозим топишмади, — дейди фуқаро.

Мурожаатчи мустақил Ўзбекистон судьялари қалам билан чизилган бир парча қоғозни асос қилиб, одамларнинг уйини бузиб ташлайверса, одамлар ҳақиқатга ишонмай қўйишини айтмоқда.

Ўша уйда яшаб фермерлик қилардик. Судьялар бир парча қоғозни асос қилиб, уйимизни бузишгач, айни кунда у ерда яшаб ҳам бўлмайди. Фермерлик фаолиятимиз тугади, уйимиз бузилиб, кўчада қолдик. Ачинарлиси мустақил Ўзбекистон судьялари қалам билан чизилган бир парча қоғозни асос қилиб, одамларнинг уйини бузиб ташлайверса, одамлар ҳақиқатга ишонмай қўяди-ку?, — дейди Равшан Сатторов.

Мурожаатчининг қўшимча қилишича, даъвогар суддан кейин уларга мурожаат қилиб, 300 миллион сўм пул беришса, уйни буздириш талабидан воз кечишини айтган.

Судда уйни қурган усталарни ҳам олиб келдик. Аммо суд буларни инобатга олмади. Даъвогарга уйни қурган усталарни кўрсатиб, қай бирини танийсиз, қайсига пул бергансиз деган саволларни бердик. Танимади. Аёл киши эканини, қурилиш ишларига аралашмаганини айтди. Энг ачинарлиси, суддан сўнг биздан 300 миллион сўм талаб қилди. Шу пулни берсак, уйни буздириш талабидан воз кечишини айтди, — дейди уйи бузилганини айтаётган мурожаатчи.

Олий суд ахборот хизмати раҳбари Азиз Абидов «Дарё» сўровига жавобан мурожаатчи Равшан Сатторов Олий суд раиси қабулига кириб чиққач, мазкур ишга доир ҳужжатлар Олий судга чақирилганини ва ўрганилаётганини айтмоқда. Унинф айтишича, ўрганиш натижалари ҳақида маълумот берилади.

«Дарё» воқеалар ривожини кузатишда давом этади.