Қашқадарё вилоят маъмурий суди «Севимли» телеканалининг Самарқанд вилоятидаги мухбири Мўътабар Нурмуҳаммедовага хусусий ажрим эълон қилганини айтди, бироқ кўп ўтмай айтган гапидан ҳам қайтди. Бу ҳақда «Дарё» мухбири Отабек Қўлдошев хабар берди.
Вилоят маъмурий суди судьялари билан мулоқот қилган «Дарё» мухбирининг ёзишича, ишни кўрган суд телевидение мухбирининг кўзини қўрқитиш учунми ёки бошқа мақсад илинжидами судда мухбирга хусусий ажрим чиқарганини маълум қилган. Аммо айтилган гап суд залидан чиққач, натижасиз қолган. Қисқасини айтганда, судда айтилган ажримдан ҳалигача дарак йўқ. Мухбирга хусусий ажрим чиқарилгани ҳақидаги қарор шунчаки айтилган бўлиб чиқмоқда.
Қизиқ, Қашқадарё вилоят маъмурий судининг айтиб, айтган гапидан қайтадиган одати ҳам борми?
Маълум бўлишича, Қарши шаҳар ҳокимлиги ва шаҳар телевидениеси ўртасидаги ер можаросини вилоят маъмурий суди кўриб чиқаётган бўлган. Мазкур жараённи ёритишга келган телевидение мухбири Мўътабар Нурмуҳаммедова суд залига киришга уринганида унинг қўл телефони ва сумкаси олиб қўйилган.
«Суд биносига киришда Миллий гвардия ходимлари телефонимни қолдиришни сўради. Сўнгра сумкамни кўздан кечиришди. Сумкани кўриб бўлгач, сумкани ҳам ташлаб кетасиз, дейишди. Ходимга одатда суд биносига иш қурол билан киришимизни, қўл телефон ва сумка ичидаги ёзув дафтари ишда жудаям зарурлигини таъкидладим. Бироқ тушунишни истамади. Суд рухсат бермаяпти, деган гапни айтди. Сумкамни олиб қолаётган Миллий гвардия ходимига агарда кимдир сумкасини қолдириб, қайтиб чиққанда ‘сумкамда минг доллар пул бор эди, қани’ деса нима қиласиз? Ҳарқалай, аёллар сумкасини олиб қолинг дейишмагандир, дедим. Бор гап шу», — дейди Мўътабар Нурмуҳаммедова.
Мўътабар Нурмуҳаммедова суд тизими билан доимий ҳамкорликда ишлашини айтиб, «Судлар ўзига зарур пайтда — қанақадир ислоҳотни кўрсатишдами ёки кимнидир қамаётгандами телевидениени чақириб ёритишни сўрашади. Қамалаётган одам менинг шахсий ҳаётим бор, дод, кўрсатма, уятдан ўламан, деса ҳам парво қилишмайди, жараённи тасвирга олишимизга рухсат беради. Унақа пайтда инсон шаънини тўртинчи даражага қўйиб қўйишади. Мабодо сиз суддан жабрланаётганларни кўрсатишга уринсангиз, томонларни рўкач қилиб судда қатнашишингизга қаршилик кўрсатишади», — деди.
Таъкидланишича, мухбир Нурмуҳаммедова Қарши шаҳар ҳокимлиги ва телевидение ўртасидаги судни ёритиш учун учун Самарқанд шаҳридан келиб, Олий суд рухсати билан судга киришга муваффақ бўлган. Бироқ судья жараённи тасвирга олишга рухсат бермаган.
«Судга Олий суддан рухсат олиб кирганимиз учунми ишни кўраётган судья бизга ўта қўпол муомалада бўлди. Операторга камерангни ўчир, мен рухсат берсамгина ‘сёмка’ қиласан, дея қўполлик қилди. Мен бундай қўполликни ҳали кўрмагандим. Энг ёмони суд бундай қилса ёмон бўларкан. Хуллас, жараёнда Қарши шаҳар ҳокимлиги ҳуқуқшуноси ва телевидение ерига эга чиққан тадбиркор судда бизнинг қатнашишимизга қаршилик қилди. Шу боис ҳам суд бизнинг ишни ёритишимизга рухсат бермади. Энг қизиғи, қарор ўқилаётган пайтда менга хусусий ажрим чиқарилганини эълон қилишди. Сабабини сўрасам, изоҳлашмади», — дейди Мўътабар Нурмуҳаммедова.
«Дарё» мухбири билан мулоқот қилган, аммо суҳбат жараёни ёзилишига рухсат бермаган судья Бахтиёр Қиличов телевидение мухбири Мўътабар Нурмуҳаммедовага унинг Миллий гвардия ходими билан бўлган мулоқоти сабаб хусусий ажрим эълон қилинганини, назорати эса прокуратурага юклатилганини, бироқ хусусий ажрим «Севимли» телеканалига юборилмаганини айтди.
Судьянинг таъкидлашича, улар мухбирнинг шаъни, эртага телевидение билан ҳамкорликда ишлашини ўйлаб, айтган гапидан қайтган.
«Мен Олий судга телефон қилиб, вилоят судьялари ишини айтдим, Кейин, Олий суддан телефон қилиб суд раиси Сиз бн гаплашиб олмоқчи дейишди. Мен қарорга изоҳ олиш учун ҳам тасвирчим билан ортга қайтдим. Бизни раис суд биноси ташқарисидаги эшиги олдида кутиб турган экан. Гаплашдик. ‘Ажрим чиқармайди’, деди. Мен сиздан ажримни чиқармасликни сўраб келмадим, изоҳ сўраб келдим дедим», — дейди телевидение мухбири.
Маълум бўлишича, суд мухбирга хусусий ажрим чиқарилганини эълон қилгач, мухбир Мўътабар Нурмуҳаммедова вилоят маъмурий суди раиси билан мулоқот қилмоқчилигини, хусусий ажрим сабабини билолмаётганини айтиб, раис билан кўришишга уринган. Бироқ бунинг имкони бўлмаган.
«Менга хусусий ажрим чиқаришгач, судьялардан бунга изоҳ сўрадим. Улар жавоб бермагач, масъуллар, хусусан, вилоят маъмурий суди раиси билан гаплашиш истагим борлигини айтдим. Аммо суд раиси билан кўришиш имкони бўлмади. Сўнгра суддан чиқиб бор ҳолат бўйича ‘сёмка’ қилдим ва ортга қайтдим», — дейди мухбир Нурмуҳаммедова.
«Дарё» мухбири билан суҳбатлашган Қашқадарё вилоят маъмурий суди раиси Холис Муҳаммедов мухбирни чақиртирганини рад этди.
«Мухбир, балки, қабулимга келган бўлиши мумкин. Аммо мен мухбирни чақиртирмаганман», — дейди вилоят маъмурий суди раиси Холис Муҳаммедов.
Холис Муҳаммедов мухбирга хусусий ажрим чиққани ҳақидаги воқеадан бехабар эканлигини, буни суд девонхонасидан билиш мумкинлигини қўшимча қилди.
Судья катта ёрдамчиси, девонхона ходими меҳнат таътилида бўлгани боис вақтинча девонхона ишларини ҳам бажариб турган Даврон Хайруллаевнинг маълумот беришича, мухбирга хусусий ажрим чиқарилмаган. Девонхонада бундай ҳужжат йўқ.
Олий суд Қашқадарё вилоят маъмурий судининг айтиб, айтган гапидан қайтишига қандай муносабат билдирар экан. Кутамиз ва мавзуга қайтамиз.
Изоҳ (0)